Aqtóbe oblysynda 100 myńnan astam zeınetker turady
ASTANA. KAZINFORM – Halyqaralyq qarttar kúnine oraı aqtóbelik zeınetkerler úshin merekelik is-shara uıymdastyryldy.
Aqtóbe oblysynyń ákimi Ashat Shaharov qurmetti qonaqtardy merekemen quttyqtap, olardyń árqaısysynyń týǵan ólkeniń damýyna qosqan úlesin erekshe atap ótti.
«Sizderdi Halyqaralyq qarttar kúnimen shyn júrekten quttyqtaımyn. Bul mereke – aǵa býyndy qurmetteý men syılaýdyń belgisi.
Sizder bizdiń elimizdiń óndirisin, ónerkásibin, bilim jáne densaýlyq saqtaý salasyn damytý úshin, ásirese táýelsizdiktiń alǵashqy jyldarynda eńbek ettińizder. Kópshiligińiz laıyqty demalysqa shyqqannan keıin de belsendi qyzmetterińizdi jalǵastyryp, turǵyndarmen kezdesip, olardyń ózekti máselelerin oblystyq máslıhatta jáne Qoǵamdyq keńeste kóterip, jas urpaqty tárbıeleý isimen aınalysyp kelesizder. Ardagerler keńesteri jergilikti ákimdiktermen birlesip, Prezıdent Joldaýy men memlekettik baǵdarlamalardy túsindirýge qatysyp keledi. Biz halyq arasynda bedelge ıe ardagerlerimizdiń jumysyn joǵary baǵalaımyz. Sizderge zor densaýlyq jáne uzaq ǵumyr tileımin», - dep oblys ákimi meımandarǵa jyly lebizin bildirdi.
Merekelik dastarhanǵa shaqyrylǵan zeınetkerler bir-birimen kóriskenderine qýanyp, kontserttik baǵdarlamany tamashalady.
Aqtóbe oblysynda 100 myńnan astam zeınetker turady. 100 jastan asqan qarttardyń sany jeteý bolsa, eń úlkeni – 109 jasta. Egde jastaǵy adamdardyń bos ýaqytyn tıimdi paıdalaný úshin 9 belsendi uzaq ómir súrý ortalyǵy jumys isteıdi. Bıylǵy jyldyń 1 sáýirinen bastap aqtóbelik zeınetkerler qoǵamdyq kólikte tegin jol júre alady.
