«Aqtóbe» men «Ordabasy» teń tústi

ASTANA. KAZINFORM -  Fýtboldan Qazaqstan Premer-lıgasynyń toǵyzynshy týrynda alǵashqy oıyn kúninde «Aqtóbe» men «Ordabasy» kezdesti.

Bıyl el birinshiliginde qos komanda táp-táýir oıyn órnegin kórsetip keledi. Aqtóbelik ujym kósh basynda tursa, shymkenttik komanda alǵashqy bestikti túıindep tur.

Byltyr el chempıony ataǵyn tuńǵysh márte jeńip alǵan «Ordabasy» bıyl da sol jetistigin qaıtalaǵandy qalaıdy. Degenmen sońǵy bes oıynda nebári eki márte jeńiske jetip, ekeýinde teń tússe, bireýinde jeńilip qaldy. Endigi kezekte olar úshin árbir kezdesýde jeńisti ýystan shyǵarmaý – basty maqsattyń biri.

Bes márte el chempıony ataǵyn jeńip alǵan «Aqtóbe» jylma-jyl sol jetistigin qaıtalaýǵa kúsh salyp júrgeni belgili. Bıyl da aldyna sondaı maqsat qoıyp otyrǵan jaǵdaıy bar.

Kezdesý barysynda jankúıerler eki komanda tarapynan qyzyqty oıyndy tamashalady. Fýtbolshylar shabýylǵa shyǵýǵa kúsh saldy. Oǵan eki komandanyń qorǵaýshylary laıyqty toıtarys berip jatty.

Komandalar 0:0 esebine qanaǵat bildirdi.

Dál qazir «Qaısar» (Qyzylorda) men «Jeńis» (Astana) oıyny ótip jatyr. Qyzylordalyq komanda 1:0 esebimen alda.

Endi atalǵan týrda 19 mamyrda «Shahter» men «Tobyl», «Jetisý» men «Qyzyljar», «Elimaı» men «Qaırat» kezdesedi.