Aqtóbe medıtsına ýnıversıtetin bitirgen dárigerler jumysty aýyldan bastaıdy

AQTÓBE. QazAqparat - Marat Ospanov atyndaǵy Batys Qazaqstan memlekettik medıtsınadyq ýnıversıtettiń 200-ge jýyq túlegi shalǵaı aýyldarda eńbek jolyn bastaıdy, dep habarlaıdy QazAqparat tilshisi.

Aqtóbedegi medıtsınalyq ýnıversıtet túlekteriniń 40% batys óńiriniń aýyldarynda jumys isteıdi. Marat Ospanov atyndaǵy BQMMÝ stýdentteriniń kásibı tájirıbesi men túlekterdi jumysqa turǵyzý monıtorıngi kafedrasynyń meńgerýshisi Altyn Almaǵambetovanyń aıtýynsha, bıyl dıplom alǵan 838 jas dárigerdiń 583-i klınıkalyq ınternatýra jáne rezıdentýra mamandyqtary boıynsha memlekettik bilim grantymen oqyǵan. Olar jalpy tájirıbe dárigeri, pedıatr, terapevt, akýsher-gınekolog jáne hırýrg sekildi suranysqa ıe mamandyqtardy meńgerdi.
«Medıtsınalyq ýnıversıtette jyl boıy Atyraý, Mańǵystaý, Batys Qazaqstan, Qyzylorda jáne Aqtóbe oblystaryna qajetti medıtsına qyzmetkerlerin bólý jumysy júredi. Bul joly da jumys berýshi, oblystyq densaýlyq saqtaý ókilderi jáne resýrstyq ortalyq ókilderiniń qatysýymen kezdesýler ótti. 2019 jyldyń sáýir aıynda respýblıkalyq komıssııanyń sheshimimen 460 túlek óńirlerge jiberildi. Sondaı-aq dekrettik demalysqa shyqqan, júkti jáne 3 jasqa deıingi balasy bar 124 túlek bul mindetten bosatyldy. 185 jas maman aýyldyq jerlerge jiberildi. Endi bes oblystyń otbasylyq-dárigerlik ambýlatorııasynda jáne aýdandyq aýrýhanalarynda memlekettik bilim grantymen jáne aýyl kvotasymen bilim alǵan túlekter jumys isteıdi», - deıdi Altyn Almaǵambetova.
Aýdandyq aýrýhanalar úshin jalpy tájirıbe dárigeri asa qajet. Ári pedıatr, akýsher-gınekolog, anestezıolog, reanımatolog jáne salalyq otolarıngolog, anestezıolog pen oftalmolog tapshy.
«Aýyl turǵyndary da joǵary medıtsınalyq qyzmet alýy tıis. Medıtsına qyzmetteriniń sapasyn jaqsartý úshin biz túlekterdi aýylǵa jiberemiz» - dedi stýdentterdiń kásibı tájirıbesi men túlekterdi jumysqa turǵyzý monıtorıngi kafedrasynyń meńgerýshisi A.Almaǵambetova.
Aıta keteıik, ýnıversıtet bitirýshilerin jumys oryndaryna bólý jumysy 1 shildede aıaqtaldy. Túlekter 1 qyrkúıekten bastap jumysqa kirisedi.