Aqtóbe mal óniminiń ımportynan bas tartýdy kózdep otyr

AQTÓBE. QazAqparat - Aqtóbelik sharýalar mal basyn arttyrý, asyldandyrý maqsatynda 11 myń bas asyl tuqymdy iri qara satyp alýdy kózdep otyr. Óńir basshysy Berdibek Saparbaev mal óniminiń ımportynan bas tartý maqsatynda jumys isteýge tapsyrma berdi, dep habarlaıdy QazAqparat tilshisi.

Aqtóbe oblysynyń ákimdiginde aýyl sharýashylyǵyn damytý maqsatynda jıyn ótti. Oǵan iri aýyl sharýashylyǵy qurylymdarynyń basshylary, bıznes birlestik, bank júıeleriniń, damý ınstıtýttary men óńdeýshi kásiporyndardyń ókilderi qatysty. Jıynda et klasterin damytý, Qazaqstandaǵy tuńǵysh sharýalarǵa qyzmet kórsetý ortalyǵyn qurý máseleleri talqylandy.

«Úkimettiń keńeıtilgen otyrysynda Memleket basshysy mal sharýashylyǵyn damytýdyń túbegeıli sharalaryn qabyldaýdy tapsyrǵan bolatyn. Bul jerde áńgime etpen qatar sút baǵytyn da damytý jaıynda bolyp tur. Óńirde belgili bir jumystar júrgizilip jatyr, biraq ázirge eleýli nátıjeler joq. Mal basynyń jylyna 3-4 paıyzǵa óskeni jetkiliksiz. Bizdiń basty maqsatymyz - mal óniminiń ımporttynan bas tartyp, eksport kólemin arttyrý», - dedi Berdibek Saparbaev.

Aýyl sharýashylyǵy basqarmasynyń basshysy Qusaıyn Sársembaıdyń aıtýynsha, 16 iri sharýa qojalyǵy mal basyn arttyryp, asyldandyrýǵa sheshim qabyldady. Bıyl 11 myń iri qara mal satyp alynady. Onyń ishinde myńdaǵan buqa baǵý josparda bar. Mal satyp alýdy sýbsıdııalaýǵa respýblıkalyq bıýdjetten qosymsha qarjy bólý josparlanýda. Aqtóbe oblysy ákiminiń baspasóz qyzmetiniń habarlaýynsha, Aqtóbede «Sharýalarǵa qyzmet kórsetý» pılottyq jobasy iske asyrylady. Onda aýyl sharýashylyǵyn óndirýshiler «bir tereze» qaǵıdasy boıynsha qajet qyzmetterdiń tolyq jıyntyǵyn alady. Joba aıasynda mal ótkizetin biryńǵaı elektrondy baza engiziledi. Mal men aýyl sharýashylyǵy tehnıkasyn satatyn aýktsıon uıymdastyrylady. Sol jerde sharýalarǵa memlekettik qoldaý kórsetetin qarjy ınstıtýttarynyń ókildikteri otyrady.

Aıta keteıik, Sharýalarǵa qyzmet kórsetý ortalyǵy memlekettik-jekeshelik áriptestik aıasynda iske asyrylady. Ortalyq maldyń baǵasyn naryq suranysyna saı satýǵa, veterınarlyq jáne azyq túlik qaýipsizdigin qamtamasyz etýge múmkindik beredi.

«Sharýalarǵa qyzmet kórsetý ortalyǵyn qurý ıdeıasyn Aýyl sharýashylyǵy mınıstrligi qoldaǵan. Endi biz ony tezirek júzege asyrýymyz kerek. Eń sońǵy merzim - osy jyldyń úshinshi toqsany. Menińshe, munyń naqty nátıjesin sharýalar ǵana emes, halyq ta sezinetin bolady. Jobany júzege asyrý arqyly ózindik qundy anyqtap, óndiris shyǵyndaryn azaıtý jáne qajetsiz deldaldardy joıýǵa, aýylsharýashylyq ónimderiniń baǵasyn tómendetýge múmkindik beriledi», - dedi óńir basshysy Berdibek Saparbaev.