Aqtóbe «Kúndelik» elektrondy jýrnalynan bas tartty

AQTÓBE. QazAqparat – Jańa oqý jylynan bastap «Kúndelik» elektrondy jýrnaly paıdalanylmaıdy. Aqtóbede Bilimland kompanııasynyń «Bilim klass» jýrnaly qoldanyla bastady, dep habarlaıdy QazAqparat tilshisi.

Aqtóbede bıyldan bastap «Bilim klass» jýrnaly qoldanysqa engizildi.

Sebebi óńirde «Aqtóbe oblysyndaǵy shaǵyn jınaqty mektepterdiń áleýetin arttyrý» atty pılottyq joba júzege asyrylyp jatyr.

«Ár aýdan ortalyǵyndaǵy 12 mektep, 134 shaǵyn jınaqty mektepti jabdyqtaýǵa 5 mıllıard teńge bólinedi. 12 mektep túgel jańartylyp, oǵan 3 mıllıard teńge jumsalady. Al 134 shaǵyn mektep úshin 2 mıllıard teńge qarastyrylǵan. Onda eki kabınetke kompıýter, ınteraktıvti taqta alynady. Al «Bilim klass» jýrnalyn qoldanýdyń óz artyqshylyǵy bolady. Munda aýyl mektepteriniń muǵalimderi úshin elektrondy nusqada daıyn materıaldar júkteledi. Barlyq tsıfrlyq resýrsty tegin qoldana alamyz. Onda 26 myńnan astam sabaq, 8 myńǵa jýyq paıdaly aqparat ornalastyrylǵan. Bári muǵalimge, oqýshyǵa qoljetimdi»,- dedi Aqtóbe oblystyq bilim basqarmasy basshysynyń orynbasary Nurgúl Bertileýova.

Aıta keıik, bıyl tek Aqtóbe oblysy «Bilim klass» jýrnalyn qoldana bastady.

Bul - elimiz boıynsha pılottyq joba.

Eske salsaq, Májilis depýtaty Erlan Saıyrov mektep oqýshylaryna arnalǵan «Kúndelik» júıesiniń olqylyqtaryn Parlamentte kóterdi.

Bul jóninde depýtat Premer-Mınıstrdiń orynbasary Tamara Dúısenovaǵa, Bas Prokýror Berik Asylovqa saýal joldady.