Aqtóbe qalasynda 28 úıge sý kirdi

AQTÓBE. KAZINFORM – Aqtóbe qalasyndaǵy turǵyn úı alabtarynda sý basý qaýpi kúsheıdi. Qazirgi kezde 28 úıge sý kirgeni anyqtaldy.

Qarǵyn sý Aqtóbe qalasyna da keldi. Qazirgi kezde birneshe turǵyn alapta úılerge sý kirip, adamdar qaýipsiz jerge kóshirilip jatyr.

«16 naýryzdan bastap kóktemgi sý tasqynyna qarsy shtab quryldy. Búginde shtabqa qala turǵyndarynan 3 myńnan astam ótinish tústi. Qazir sý shyǵarý jáne ınertti materıaldardy jetkizý jumysy júrip jatyr. Ótinishter kóbinese jeke turǵyn úı sektorlarynan jáne turǵyn alaptardan tústi. Qazirgi ýaqytta 160 assenızator jáne 80-nen astam aýyr tehnıka, 20 KamAZ, 8 traktor, 9 júk tıegish sekildi birneshe tehnıka bar. Barlyǵy 40 mobıldik top jumyldyryldy. Esep boıynsha 28 úıge sý kirdi», - dedi Aqtóbe qalasy ákiminiń baspasóz hatshysy Aıgúl Baımenova.

Turǵyndar bir emes, birneshe ret kómek suraýǵa májbúr. Sebebi sý sorý jumystary júrgizilgenimen, keıin qaıta jınalyp jatyr.

«Eki assenızator ǵana kelip, eki saǵatqa joq bolyp ketedi. 10 úıge eki kólik jiberip otyr. Bul az. Biz túnde qolymyzǵa ilikkenin alyp, ketip qaldyq. Úıdegi tórt er adam sol jaqta júr, ózim týysymnyń úıindemin. Bizge jan-jaǵymyzdan sý kelip jatyr. Sony toqtatyp, sý sorsa deımiz», - dedi Jańa Qarǵaly turǵyn alabynyń turǵyny Albına Kaıranbaı.

Mundaı jaǵdaı turǵyn alaptarymen qatar baý-baqsha ujymdarynda da tirkeldi. Bárinde áıelder týma-týysyn jaǵalap ketse, er adamdar úı kúzetip qalǵan.

«Úsh kún boldy sýdyń kelgenine. Byltyr jol salǵanda sýaǵardy qaldyrmaı ketip, búgin ábigerge salyp tur. Kórshimiz sol sýaǵardy aıtyp, qurylysqa qarsylyq bildirgende polıtsııa shaqyryp edi. Al qazir sol durys bolmaǵanyn kórip otyrmyz. Bul qardyń kóptiginen emes, tabıǵı sýaǵardyń jabylýynan boldy», - dedi qala turǵyny Zeınel Aqjanov.

Aıta keteıik, oblys boıynsha 230 adam evakýatsııalandy. Barlyǵy aýdandarda.