Aqtóbe oblysynda birneshe aýyldan 230 adam evakýatsııalandy
AQTÓBE. KAZINFORM – Aqtóbe oblysy boıynsha áli de tasqyn qaýpi joǵary aýdandar bar. Qazir birneshe aýdanda 230 adam evakýatsııalandy.
Aqtóbe oblysynda jańbyr jaýyp, qarǵyn sý tez erip jatyr. Ári aýa raıy jyly. Qazirgi kezde keıbir aýdanda tasqyn qaýpi seıilse, keıbirinde kúsheıe tústi.
«Temir aýdanynda qazir qaýip seıildi. Endi Muǵaljar aýdanynda Jem jáne Temir ózenderi kóterilip, qaýip tónip tur. Jaǵabulaqta 180 adamdy evakýatsııalaý qajet boldy. Olar munaı kompanııasynyń vahtalyq qalashyǵyna ornalastyryldy. Sol 180 adamnyń 93-i bala. Odan bólek Jem ózeniniń kóterilýinen Birlik jáne Sheńgelshi aýyldaryna da qaýip tóndirip tur. Ol jerde jergilikti atqarýshy organ, tótenshe jaǵdaılar qyzmeti birigip, úlken jumys júrgizip jatyr. Sonymen birge Oıyl aýdanyndaǵy Amangeldi aýylyna qaýip tónip tur. Ol jerde de bógetti nyǵaıtý jumysy júrip jatyr», - dedi Aqtóbe oblystyq TJD bastyǵynyń orynbasary Saıd Moldaqaraev.
Sonymen birge Mártók aýdany Saryjarda qarǵyn sý qaýip tóndirip, túnde 30 adam evakýatsııalanǵan. Olar evakýatsııalyq pýnktke emes, týystarynyń úıine ornalastyryldy. Mundaı jumys Shalqar aýdanynda da atqaryldy. Jalpy Aqtóbe oblysy boıynsha barlyǵy 230 adam evakýatsııalandy. Sonymen birge 32 múıizdi iri qara da evakýatsııalandy.
«Aqtóbe qalasynda da erigen qar sýy kóbeıip jatyr. Jergilikti atqarýshy organdary men tótenshe jaǵdaılar qyzmeti kúndiz-túni jumysta. Qazir 6655 áskerı bóliminen 100 adam daıyndaldy. Sonymen birge Temir aýdanyna jiberilgen 20982 áskerı bóliminen 54 adam adam men 6 tehnıka keri shaqyryldy. Olar da aldyn alý jumystaryna jumyldyrylady», - dedi Aqtóbe oblystyq TJD bastyǵynyń orynbasary Saıd Moldaqaraev.
Aıta keteıik, Aqtóbeniń barlyq aýdanynda áli de qaýip seıilmeı tur. Barlyǵy 120 myń tekshe metr sý soryldy. 20 myńnan astam qapqa qum toltyrylyp, tóselip, 3 myń tonnadan astam ınetti materıal tasyldy. Qazir aýdandar boıynsha barlyǵy 10 úıge sý kirgen. Oblystyq TJD habarlaýynsha, beseýi Temir, tórteýi Shalqar, bireýi Muǵaljar aýdanynda. Sonymen birge 61 aýlany sý basty. Adammen qatar mal da evakýatsııalanyp jatyr.