Sý tasqyny: Aqtóbe áli kúnge tótenshe jaǵdaı rejıminde ómir súrip jatyr
AQTÓBE. KAZINFORM — Aqtóbe qalasy men 6 aýdanda tótenshe jaǵdaı rejımi áli saqtaýly. Qazirgi kezde oblys bıylǵy kóktemgi sý tasqyny kezeńine daıyndalyp jatyr.
150 assenızator men 80-nen astam aýyr tehnıka daıyn — Aqtóbe qalasy
Aqtóbe qalasy mańyndaǵy Aqtóbe jáne Sazdy sý qoımalary byltyr tolyp, qalaǵa qaýip tóndirdi. Sondyqtan Aqtóbe sý qoımasynan úlken kólemde sý jiberildi.
Al Sazdy sý qoımasy óz-ózin retteıtin bolǵan soń artylǵan sý qalaǵa qaraı aqty. Saldarynan Aqtóbe qalasynyń 11 jáne 12 shaǵynaýdandaryna qaýip tónip, tótenshe jaǵdaı qyzmeti men áskerıler birneshe saǵat alysty.
Qazirgi kezde byltyrǵy tasqyn qaıtalanbas úshin bógetter nyǵaıtyldy, jaǵalaý bekitilip jatyr.
— Aqtóbe qalasynda bóget salý, jaǵalaýdy nyǵaıtý, sý ótkizý qurylystaryn salý, arnalardy keńeıtý, arnalardy qamystan, qulaǵan aǵashtardan tazartý jáne taǵy basqa da jumys atqaryldy. Qazirgi ýaqytta Elek pen Qarǵaly ózenderiniń túıisken tusy qaýipti aýmaq bolyp otyr. Ol aýmaqtyń eń tómengi núktesinde, ózen jaqyn jerde «Eko» baý-baqsha ujymy ornalasqan. Sondyqtan topyraq úıindisin 3 metr bıiktikke kóterip, bóget jasalyp jatyr. Ár 25-30 santımer saıyn arnaıy tehnıkamen tyǵyzdap, bekitedi. Onda 12 samosval, avtogreıder, katok, júk tıegish, eki ekskavator jumysqa tartylǵan. Budan bólek Elek ózeniniń «Aktıýbrentten», «Ýrojaınyı», «Zelenstroı» baý-baqsha ujymdary ornalasqan tusy da tómengi núkte sanalady. Qazir Zarechnyı kópirinen Kirpishti kópirine deıin bıiktigi 3 metrden asatyn topyraq jáne qoı tastarmen (býtovye kamnı) úıindi jasalyp jatyr, — dedi Aqtóbe qalasy ákiminiń baspasóz hatshysy Aıgúl Baımenova.
Qala ákimdigi jyljymaly sorǵy, sýasty sorǵylary, motopompa, syıymdylyǵy 3-7 tekshe metrge deıin jetetin 150 assenızator, 80-nen astam aýyr tehnıka ázirledi.
Onyń ishinde býldozer, kran, ekskavator, tıegishter, júk tasymaldaǵysh kólikter bar.
Sý tasqynyna qarsy sharalarǵa 251 mln teńge, al assenızatorlar qyzmetine 300 mln tg qarastyrylyp tur.
Muz jarý jumysyna 20 mln teńge bólindi — Qobda aýdany
Byltyr Qobda aýdanynda 288 úı sýǵa ketip, 155-i jaramsyz dep tanyldy. Qulaǵan úılerdiń ornyna jańasy salynyp, keıbiri úı satyp aldy.
Aýdanda uzyndyǵy 9,2 shaqyrym qorǵanys bógetin salý, 9,2 shaqyrym jasandy qorǵanys bógetterin jóndeý, 1,1 shaqyrym aryq salý jumysy júrgizildi.
— Sý tasqynynyń aldyn alý maqsatynda 15 motopompa, 12 generator, qýaty 20 kVt/saǵ bolatyn 1 generator, 1 nasos stansasy, 16 úrmeli, 3 motorly qaıyq, 36 000 dana qapshyq, 34 dana qutqarý keýdeshesi, 2 jyljymaly motopompa, 16 tonna janar-jaǵarmaı, 60 dana kombenızon, azyq-túlik qory, 500 tonna ınertti materıal, 30 dana ár túrli tehnıka daıyndaldy jáne jedel áreket etý jasaqtary quryldy. Kóktemgi sý tasqynyna aýdandyq bıýdjetten 32 mln teńge qarajat bólindi. Ózenderdegi muz jarý jumysyna 20 mln teńge bólinip, qazirgi tańda muzdy jarý oryndary anyqtalyp, memlekettik satyp alý ótkizilip jatyr, — dep habarlady Qobda aýdanynyń ákimdigi.
Bul aýdanda bıyl qar shyǵarýǵa 15 mln teńge bólinip, 2 myń tekshe metr qar shyǵaryldy. Qazir 5 evakýatsııalyq pýnkt bar.
Olar: aýdandyq balalar-jasóspirimder sport mektebi, Qobda qazaq orta mektebi, Qobylandy batyr atyndaǵy orta mektep, aýdandyq kópsalaly kolledj, Aqrab jáne Jırenqopa mektepteri.
Jalpy syımdylyǵy — 700 adam.
Jol, kópir, bóget salý, nyǵaıtý jalǵasyp jatyr — Oıyl aýdany
Byltyr sý tasqyny kezinde eń kóp zardap shekken Oıyl aýdanynda 328 úıge sý kirip, onyń 307-si apatty dep tanyldy.
Aýdanda barlyǵy 176 úı salýǵa sheshim qabyldanyp, qurylysy aıaqtaldy. Al qazir kóktemgi sý tasqynyna daıyndyq júrip jatyr.
— Aýdanda 931 tekshe metr qar shyǵaryldy, jumystar jalǵasyp jatyr. Jergilikti atqarýshy organ janar-jaǵarmaı qoryn, 30 000 dana qapshyq, 5 qaıyq, 31 sý sorý motopompasyn, 150 000 tonna ınertti materıal ázirlendi. Sonymen birge 2 júk tıegish, 8 MTZ-82, 3 assenızator, 2 ÝAZ daıyndyqqa keltirildi, bıýdjetten 20 mln 70 myń teńge bólindi, — dep habarlady Oıyl aýdanynyń ákimdigi.
2025 jylǵy sý tasqyny kezeńine daıyndyq úshin 11 is-shara qarastyrylyp, engizildi. Qazirgi tańda 6 is-shara oryndaldy, beseýinde jumys júrip jatyr.
Olar:
— Qaratal aýylyna jáne Oıylǵa kirberis joldardy aǵymdaǵy jóndeý;
— Oıyl aýylyna kireberis kópirin rekonstrýktsııalaý;
— Qaratal jáne Aqkemer aýyldarynda jaǵalaýdy nyǵaıtý, qorǵanys bógetin salý.
Oıylda 6 gıdrotehnıkalyq qurylys («Qazsýshar» RMM menshigindegi «Tamdykól», «Qıyl-Tassaı», «Jekendisaı» jáne kommýnaldyq menshiktegi «Muqan», «Kúb», «Batpaqty») ornalasqan.
Bıyl «Qazsýshar» menshigindegi gıdrotehnıkalyq qurylystar jóndeledi. Arasynda byltyrǵy sý tasqyny kezinde buzylǵan gıdrotehnıkalyq qurylys bar.
— Aýdanǵa qosymsha motopompa, janar-jaǵarmaı, qapshyq, sý tasqynyna arnalǵan rezińke etikter, qaıyq tirkemeleri, qutqarý keýdesheleri alý, ınertti materıal qoryn jasaqtaý jáne evakýatsııalyq pýnkterge tósek-oryndar alý jumystaryn qosymsha júrgizý josparlandy. Sonymen qatar Oıyl, Qıyl ózenderi boıynda muz jarý jumysy júrgiziledi. «Temırtaý-Býr» JShS-men kelisim jasaý josparlanyp otyr. Al Aqkemer, Qaratal aýyldaryn sýdan qorǵaý maqsatynda salynǵan bógetter tolyqtaı aıaqtaldy, — dep habarlady Oıyl aýdandyq ákimdigi.
Bógetter salynyp, sý burý sharalary jasaldy — Yrǵyz aýdany
Byltyr sý tasqyny kezinde Yrǵyzda Nura aýyly túgel sý astynda qalyp, aýyl Saryoba jerine kóshirildi. Tasqynnan soń aýdan boıynsha barlyǵy 120 úı salýǵa sheshim qabyldanǵan. Bıyl munda bógetterdi nyǵaıtý, sý burý jumysy júrgizildi.
— Aýdanda 250 myń dana qapshyq, 16 motopompa jáne tehnıka daıyndaldy. Qysta aýyldarda qar shyǵarý jumysy júrip jatyr. Ótken jylǵy sý tasqynyn eskerip, Yrǵyz, Qutıkól, Belsher, Mamyr, Quılys, Jaısańbaı, Janys bı, Amankól jáne Sheńbertal aýyldarynda qorǵanys bógetterin turǵyzý jáne jóndeý jumystary júrgizildi. Budan basqa jazǵy-kúzgi kezeńdegi ınjenerlik jumystar josparyna sáıkes sý burý sharalary oryndaldy, — dedi Yrǵyz aýdany ákiminiń orynbasary Asqar Ýálı.
Aqtóbede 58 eldimeken qaýipti aýmaqta tur — TJD
Aqtóbe oblystyq ákimdigi men oblystyq TJD qazir kóktemgi sý tasqyny kezeńine birlesip daıyndalyp jatyr.
Bóget bekitý, jaǵalaýdy nyǵaıtý jumysyn tótenshe jaǵdaılar qyzmeti qarap, kemshin tusynda eskertý beredi. Qazirgi kezde 58 eldimeken qaýipti aýmaqta tur. Onda 66 myńnan astam adam turady.
Oblystyq TJD baspasóz qyzmeti taratqan aqparatqa súıensek, ózgelerge qaraǵanda 35 eldimekende (6 097 úı, 31 202 adam) qaýip saqtalǵan. Daıyndyqqa jergilikti bıýdjetten 420 mln teńgeden astam qarjy bólingen.
Al respýblıkalyq bıýdjet esebinen 4 jedel kólik, 2 jol talǵamaıtyn kólik satyp alyndy. Oǵan 396,4 mln teńge qarjy jumsaldy.
Bıyl jospar boıynsha Elek, Yrǵyz, Saǵyz, Temir, Oıyl, Kenjaly, Úlken Qobda, Or ózenderi jáne Shalqar kólinde muz jarý jumysy júrgiziledi.
Sý qoımalarynan sý jiberilip, kóktemge daıyndaldy — Qazsýshar
Aqtóbe oblysynda úsh iri sý qoımasy bar: Aqtóbe, Qarǵaly, Sazdy. Úsheýi 410-415 mln tekshe metr sý qabyldaı alady.
Aqtóbe sý qoımasynyń syıymdylyǵy 245 mln tekshe metr bolsa, byltyr jóndeý jumysy júrgizilip, tek 50 mln tekshe metr sý qaldy. Sonymen birge Sazdy sý qoımasy jóndeldi.
Oblys ákimi baspasóz qyzmetiniń habarlamasyna súıensek, qazir mundaǵy sýdyń naqty kólemi — 2,5 mln tekshe metr. Al jobalyq kólemi — 7,5 mln tekshe metr.
Al Qarǵaly sý qoımasynda bıyl qaıta jańartý jumystary jasalady. Bólingen 140 mln teńgege jobalyq-smetalyq qujattama jasalynyp jatyr.
Úsh sý qoımasynda da kóktemgi sý tasqynyna daıyndyq úshin ınertti materıaldar men janar-jaǵarmaı ázirlengen, dızeldi rezervtik elektrogeneratorlar qondyryldy.
Byltyr Aqtóbe oblysy boıynsha myńnan astam úı turýǵa jaramsyz bolyp qaldy. Onyń teń jartysy qaıta salynsa, turǵyndardyń teń jartysy úı satyp aldy.
Qazirgi kezde Aqtóbe qalasy men 6 aýdanda jergilikti deńgeıdegi tótenshe jaǵdaı rejımi saqtaýly. Sý tasqynynyń saldary tolyq joıylmaı, tótenshe jaǵdaı alynbaıdy. Bul ákimdik jaýaby.