Aqtóbe ákimi qoqys shyǵarýdaǵy problemanyń sebebin atady

AQTÓBE. QazAqparat – Aqtóbede qaladan qoqys shyǵarý máselesinde taǵy túıitkil týyndady. Shahar basshysy Murat Jórebekovtiń aıtýynsha, tarıf tómen ári turǵyndar úıdegi adam sanyn naqty kórsetpeıdi. Eki sebep jumysty turalatty, dep habarlaıdy QazAqparat tilshisi.

Aqtóbe qalasynyń ákimi Murat Jórebekov búgin qoqys alańdaryndaǵy jaıdyń naqty sebebin atady. Túnde qalany da aralap, merdiger mekemelermen de kezdesti.
«Qordalanǵan máselelerdiń biri – qoqystyń ýaqtyly shyǵarylmaýy. Qalany aralap shyǵyp, qoqysqa toly eski konteınerlerdi kórýge bolady. Jeke sektorda jáne turǵyn alaptarda qoqys jáshikteri tapshy. Búgin osyǵan baılanysty merdiger kompanııalarmen kezdesip, olardyń dálel-dáıegin tyńdadym.

Qalada 3 kompanııa qoqys shyǵarýmen aınalysady. Olardyń bul bızneske degen ekonomıkalyq turǵyda qyzyǵýshylyǵy óte tómen, tehnıkalar parki, jumysshylar shtaty jetkiliksiz. Al qosymsha qoqys tasıtyn mashınalar men jańa qoqys jáshikterin satyp alý olar úshin arman ǵana. Sebebi kiristeri kúndelikti shyǵyndaryn áreń ótep otyr»,- dedi Aqtóbe qalasynyń ákimi.

Kompanııalardyń keıbiri rasymen de kelisimshartty úzýge qarsy bolmaǵan. Tipti básekege qabiletsiz ekenin moıyndaǵan.

«Bul jaǵdaıdyń osyndaı kúrdeli kúıge jetkeniniń negizgi 2 sebebin túıindedim. Birinshiden, tólemaqy jasaýǵa kelgende qala turǵyndarynyń shamamen 30% úıdegi adam sanyn naqty kórsetpeıdi. Al 25% qoqysty shyǵaratyn kompanııalarmen kelisimshart jasamaǵan. ıAǵnı, olar qyzmet úshin is júzinde tólemeıdi.

Ekinshiden, tarıftiń tómendigi. Qatty turmystyq qaldyqtardy shyǵarý úshin bekitilgen tarıf bir adamǵa aıyna 180 teńgeni quraıdy. Bul elimiz boıynsha eń tómen tarıfterdiń biri.

Kompanııalarda basqa qarjylandyrý kózderi joq. Osy eki máseleni sheshpeı, kommýnaldyq qyzmetter qoqysty ýaqtyly shyǵara almaıdy. Óz jumysshylaryn jáne qolda bar tehnıka parkin ustap qalýdyń ózi ekitalaı. Osyǵan baılanysty úı basqarýshy uıymdar turǵyndarǵa jaǵdaıdy túsindirip, qoqys tasıtyn kompanııalarmen kelisimshartqa turý keregin jetkizip aıtyp, járdemdesýi tıis.

Ár úıdiń aýlasynda konteıner alańdary taza bolýy kerek jáne ony úı basqarýshy kompanııalar baqylaýǵa alýy qajet. Eski jıhaz, qurylys materıaldarynyń synyqtary jáne basqa da iri kólemdi qaldyqtar, sol qoqys ıeleriniń esebinen shyǵarylýy tıis»,- dedi M.Jórebekov.

Foto: Aqtóbe qalasy ákiminiń baspasóz qyzmeti.