Aqtaýdaǵy ortalyq dańǵylǵa Elbasynyń esimi berildi

AQTAÝ. QazAqparat - Budan bylaı Aqtaýdaǵy eń úlken dańǵyl QR Tuńǵysh Prezıdenti-Elbasy Nursultan Nazarbaevtyń esimimen atalatyn bolady. Búgin Mańǵystaý oblystyq máslıhatynyń otyrysynda depýtattar osyndaı sheshim qabyldady, dep xabarlaıdy QazAqparat tilshisi.

Aqtaýdaǵy ortalyq dańǵyl 1-shi yqsham aýdandaǵy Aqbota saıabaǵynan bastap, 17-shi yqsham aýdandaǵy «Grın Park» turǵyn úı keshenine deıin jalǵasyp jatyr.

Bul, QR Úkimeti janyndaǵy Respýblıkalyq onomastıka komıssııasynyń 2019 jylǵy 20 naýryzdaǵy qorytyndysy negizinde «Qazaqstan Respýblıkasynyń ákimshilik-aýmaqtyq qurylysy týraly» 1993 jylǵy 8 jeltoqsandaǵy Qazaqstan Respýblıkasy Zańynyń 11-babynyń 4-1) tarmaqshasyna sáıkes qabyldanǵan sheshim.

Sessııada sóz alǵan máslıhat depýtaty Tabyldy Ámirov: «Elbasy qıyn-qystaý kezeńde eldi tyǵyryqtan shyǵaryp, búkil álemge Qazaq elin tanytqan tulǵa. Ol eńbegin búkil halyq moıyndap, alǵysyn aıtýda. Dál osy sátte Nursultan Ábishulyna qandaı madaqtaý aıtsaq ta artyq emes. Onymen birge, tarıhı kúni Májiliste aıtylǵan usynystar, ıaǵnı Astana qalasyna esimin berý, monýment qoıý, oblys ortalyqtarynda úlken kósheler berip, ulyqtaý - óte durys. Ol halyqtyń oıynan shyǵyp jatyr. Biz de búgin bir kisideı jınalyp, uly sheshim qabyldadyq. Biz bir bolyp, óńir basshysymen birge Elbasynyń bastaǵan isin ári qaraı jalǵastyrýǵa ázirmiz. Nursultan Ábishulyna denine saýlyq, otbasyna amandyq tileımin»,-dedi.

Jıyn sońynda oblys ákimi Eraly Toǵjanov ortalyq dańǵylǵa Nursultan Nazarbaev esimin berý týraly sheshim qabyldaǵany úshin alǵysyn bildirdi.

Eske salaıyq, 20 qazan kúni QR Prezıdenti mindetin ýaqytsha atqarýǵa kirisken Qasym-Jomart Toqaev óńirlerdegi ortalyq kóshelerge QR Tuńǵysh Prezıdenti-Elbasy Nursultan Nazarbaevtyń esimin berý usynysyn jasaǵan bolatyn.