Aqtaýda jas sýretshiler sımpozıýmy bastaldy

AQTAÝ. QazAqparat - Aqtaý qalasynda jas sýretshilerge arnalǵan sımpozıým bastaldy. Sharaǵa Qyrǵyzstan jáne Ózbekstannan qylqalam sheberleri arnaıy shaqyrtyldy, dep habarlaıdy QazAqparat tilshisi.

«Ótkizilip otyrǵan sımpozıýmnyń maqsaty - óńirdegi sýretshilerdiń biliktiligin arttyryp, ózara tájirıbe almasý. Sondaı-aq jastardyń sýret ónerine degen qyzyǵýshylyǵyn arttyrý. Mańǵystaý oblysy - shalǵaıda ornalasqan, ıaǵnı Almaty, Astana sııaqty mádenı oshaqtardan alysta. Bizge munda sheberlik saǵattaryn ótkizip turý mańyzdy. Óıtkeni sýretshilerimizdiń damýy úshin, respýblıkalyq jáne halyqaralyq deńgeılerge jetý úshin mundaı sharalar kóp bolýy kerek», - deıdi uıymdastyrýshylardyń biri «Aqtaý qalalyq sýretshiler odaǵynyń» múshesi Tynyshbek Baltabaev.

Sımpozıýmnyń alǵashqy kúni stýdııada ótse, ekinshi kúni Bozjyra shatqalynda uıymdastyrylady. Onda sýretshiler tabıǵat aıasyna etıýd salýdyń tyń tásilderin meńgeretin bolady.

«Ózbekstannan osy sımpozıýmǵa arnaıy shaqyrylǵan qonaqpyn. Kelgendegi maqsatymyz - neshe jyldyq jınaǵan tájirıbemizben bólisip, kerek jerinde ózimizge de qajetti dúnıelerdi alý. Mańǵystaý óńirine kelip, kartınalarmen tanysqanymda sýretshilerdiń úlken potentsıaly bar ekenin kórdim. Olardyń ártúrli tústerdi aralastyryp, jańa reń alýy óte keremet. Bul jerde Mańǵystaýdyń tabıǵaty da erekshe ról oınaıdy. Sebebi munda sarǵysh, qońyr tústiń óziniń san alýan túri bar», - dedi sýretshi Shavkat Mamatkarımov.