Aqtaýda zeınetkerler kompıýtermen jumys isteýdi jáne aǵylshyn tilinde sóıleýdi úırendi
AQTAÝ. KAZINFORM – Aımaqta egde jastaǵy 30 dan astam turǵyn «Kúmis jas» jobasy aıasynda jedel kýrs oqyp, sertıfıkat aldy. Endi olar Mańǵystaýǵa kelgen týrısterge gıd-ekskýrsovod qyzmetin kórsetedi. 3 aılyq oqýda olar kompıýtermen jumys isteýdi jáne aǵylshyn tilinde sóıleýdi úırengen.
Gıd-ekskýrsovod sertıfıkatyn ıelengenderdiń biri – 66 jastaǵy Aqtaý qalasynyń turǵyny Aqshaı Beshakova. Ol 30 jyl boıy dáriger bolyp jumys istegen. Zeınetkerlikke shyqqan soń ózin jańa qyrynan synap kórmek.
«Zeınetkerlikke shyqqaly úıde otyrdym. Qoǵamnan ajyrap qalady ekensiń. Al myna «Kúmis ýnıversıtet» bizge kóp múmkindik berdi. Bizdi oqýǵa shaqyryp, kýrs oqytty. Endi osy bilimimdi paıdalanyp, jumys istesem deımin. Týrıstik fırmalarǵa biz týraly málimetter jiberildi», - deıdi ol.
Kýrs bitirgen zeınetkerlerdiń eń jasy 52-de. Al eń úlkeni bıyl 87 jasqa shyǵady. Solardyń biri – Túrkmenbaı Kókimbaevtyń jasy 83-te. Ol da kýrs oqyp, sertıfıkat aldy. Endi ol týrısterge óńirimizdiń tarıhyn aıtyp, kıeli oryndardy tanystyrmaq nıette.
«Mańǵystaý – ashyq aspan astyndaǵy murajaı, tunǵan tarıh qoı. Ony biz aıtpaǵanda kim aıtady? Biz týraly málimetter ekskýrsııa ortalyqtaryna jiberildi. Eger sol ekskýrsovod kerek bolsa, bizdi shaqyrady. Shaqyrmasa da, biz ózimiz baraıyq dep turmyz. Biz úshin ótkizip jatqan kýrstary óte jaqsy», - deıdi Túrkmenbaı Kókimbaev.
«Kúmis ýnıversıteti» jobasynyń alǵashqy kýrsy modýldik júıe boıynsha oqytylǵan. ıAǵnı qatysýshylar ekskýrsııa uıymdastyryp, ótkizýdi, ekskýrsııalyq marshrýt pen ekskýrsovodtyń portfolıosyn jasaýdy úırengen.
«Endi osy kýrsty jetildiremiz. Aýqymdap, onyń ıntegratsııasyn kóbeıtemiz. Ózimizdiń oqytýshy-professorlarymyz quramynan, bizdiń bilim alýshylarymyzdan keri baılanys aldyq. Uzaq merzimdi emes, toqsandyq merzimdegi kýrsqa jalǵastyramyz ba degen oıymyz bar. Qazir bir mamandyqtan bastadyq, endi qosymsha mamandyqtar sanyn talqylaımyz», - deıdi joba úılestirýshisi Berik Ahmetov.
