Aqtaýda zańsyz salynyp jatqan turǵyn úı kesheni buzyldy
Tekserý nátıjeleri turǵyn úı kesheni jumys jobasynsyz jáne saraptamanyń oń qorytyndysyn almaı salynǵanyn kórsetti, dep habarlaıdy Kazinform Mańǵystaý oblystyq Qoǵamdyq kommýnıkatsııa ortalyǵyna silteme jasap.
Ortalyqtyń habarlaýynsha, memlekettik sáýlet-qurylys baqylaý basqarmasy osy qurylysty zańsyz dep taný týraly talapty qanaǵattandyrǵan sotqa júgingen.
Mańǵystaý oblysynyń memlekettik sáýlet-qurylys baqylaý basqarmasynyń aqparaty boıynsha, qurylysqa qajetti ruqsatnama qujattarynsyz jáne jobalaý-smetalyq qujattamasy jasaqtalmaı júrgizilgen. Bul «Qazaqstan Respýblıkasyndaǵy sáýlet qala qurylysy jáne qurylys qyzmeti týraly» zańyna qaıshy (68-bap).
Qurylys salýshyǵa qurylys-montaj jumystaryn toqtata turý týraly nusqama berildi jáne QR ÁQBtK-niń 316, 321 jáne 463-baptaryna (Ákimshilik quqyq buzýshylyq týraly Kodeks) sáıkes ákimshilik jazalaý sharalary qabyldandy.
- Aqtaýda qajetti ruqsatnama qujattarynsyz zańsyz salynǵan qurylys nysandary qatań tekserilýde. Kóptegen talap aryzdar zańsyz qurylysty toqtatý maqsatynda sotqa jiberildi. Sondaı-aq, qoldanystaǵy zańnamaǵa sáıkes májbúrlep buzý sharalary qabyldanady, - dedi Mańǵystaý oblysynyń memlekettik sáýlet-qurylys baqylaý basqarmasynyń basshysy Dáýren Ótepqalı.
Mańǵystaý oblysynyń memlekettik sáýlet-qurylys baqylaý basqarmasy zańsyz qurylystardy súrý maqsatynda Mańǵystaý oblysynyń mamandandyrylǵan aýdanaralyq ekonomıkalyq sotynda sot rásimderine bastamashylyq jasady.
