Aqtaýda tolassyz jaýǵan jańbyrdan, kóshelerdi sý basyp jatyr
AQTAÝ. KAZINFORM – Shaharda 3 kún qatarynan jańbyr jaýyp, turǵyndardy ábigerge salyp jatyr. Sebebi, kóshelerde sýaǵarlar joq. Sonyń saldarynan jınalǵan sýdan aıaq alyp júrý múmkin emes. Kólik qozǵalysy da qıyndady.
Turǵyndar qalanyń jaýyn-shashynǵa daıyn emesin aıtyp, sýaǵarlardyń salynbaýyna shaǵymdanýda.
– Aımaqta keıingi jyldary jaýyn-shashyn jıiledi. Bul bir jaǵynan qýantady. Biraq kóshelerdi sý basyp, osyndaı qıyndyqtarǵa tap bolyp jatyrmyz. Jyl saıyn qaıtalanady. Másele túbeıgeıli sheshilse eken, - deıdi qala turǵyny.
Al, Aqtaý qalasynyń ákimdigi sý sorý jumystarynyń jalǵasyp jatqanyn jetkizdi. Kommýnaldyq qyzmet mamandary kúni-túni eńbek etýde.
– Aqtaýda kommýnaldyq sala qyzmetkerleri avtomobıl joldarynda jınalǵan jańbyr sýyn soryp alý jumystaryn júrgizip jatyr. Bul jumystarǵa 13 qyzmetker, 12 sý sorǵysh motopompa jáne arnaıy 4 tehnıka jumyldyryldy. Nátıjesinde 350 sharshy metr jańbyr sýy alyndy. Atalǵan jumystar qala aýmaǵynda táýlik boıy jalǵasýda, - dep habarlaıdy qala ákimdiginiń baspasóz qyzmeti.
Buǵan deıin, Aqtaýda mýzeıde adam terisinen jasalǵan ámııan saqtalǵany týraly jazǵan edik.