Aqtaýda teńiz jaǵalaýynan ıtbalyqtyń óleksesi tabyldy

AQTAÝ. KAZINFORM – Sý janýarynyń óleksesi Samal-1 shaǵyn aýdany aýmaǵynan anyqtaldy. Ony demalýshylar baıqap, áleýmettik jelige júktegen.

- Bul alǵashqy oqıǵa emes. Másele ýshyqty. Halyq júretin jerde ıtbalyqtar ólip jatyr, - dep jazdy turǵyndardyń biri. 

Oqıǵa ornyna quzyrly organ ókilderi baryp, ıtbalyqtyń óleksesin anyqtaǵan.

Mańǵystaý oblystyq balyq ınspektsııasy basqarmasynyń málimetinshe, ıtbalyq joıýǵa jiberilgen. 

- 23-maýsym kúni saǵat 13:20-da Aqtaý qalasynyń Samal shaǵyn aýdany tusynda, Kaspıı teńizi jaǵalaýynan ıtbalyqtyń óleksesi tabyldy. Tekserý kezinde ınspektsııa qyzmetkerleri men janýarlar dúnıesin qorǵaý qyzmetiniń mamandary boldy. Itbalyq óleksesi joıý úshin kommýnaldyq qyzmetke tapsyryldy, - delingen habarlamada. 

Mańǵystaý oblystyq balyq sharýashylyǵy basqarmasynyń janýarlar dúnıesin qorǵaý jónindegi qyzmeti mamandarynyń aıýynsha, atalǵan ıtbalyqtyń ólgenine shamamen 2 aı bolǵan. 

- Ólekse qatty ydyraǵan. Jalpy, teńiz janýarlary ólgennen keıin, teńizdiń túbine túsedi. Ýaqyt óte tabıǵı gaz túzilý protsesteriniń nátıjesinde, ólekse sý betine qalqyp shyǵyp, jel men aǵystardyń áserinen jaǵaǵa shyǵyp qalady. Soǵan qaraǵanda, aldyn-ala boljam boıynsha, ıtbalyq shamamen eki aı buryn ólgen, - deıdi mamandar. 

Buǵan deıin, Mańǵystaýda teńiz jaǵalaýynan 279 ıtbalyqtyń óleksesi tabylǵan bolatyn.