Aqtaýda shubat iship, baýyrsaq jeýden saıys ótti
Aqtaý qalalyq jastar ortalyǵy mádenı-demalys kesheniniń uıymdastyrýymen ótken shara Konstıtýtsııa kúnine oraılastyryldy. Saıabaqqa jınalǵan kópshilik ortalyq daıyndaǵan merekelik kontsertti tamashalady. Sonymen qatar uıymdastyrýshylar qazaqtyń ulttyq dástúrin, ulttyq taǵamdaryn nasıhattaýdy kózdegen. Osy maqsatta kórermender arasynda «Shubat ishý», «Baýyrsaq jeý», «Qarbyz asaý» saıystary ótkizildi. Ár saıysqa qatysýǵa nıettiler kópshilik arasynan sol sátte anyqtaldy. Olardyń jyldamdyqtary synalyp, taǵamdy eń birinshi taýysqandary úzdik dep tanyldy.
«Men munda kontsert tamashalaýǵa kelgenmin. Shynymdy aıtsam, mundaı saıystar uıymdastyrylatynyn bilmedim. Degenmen saıysty habarlaǵan kezde qatysyp kóreıin dep sheshtim. Kúndelikti ómirde úsh staqan shubatty birden iship taýysa almaımyz ǵoı, onyń ústine ydys úlkendeý. Biraq barynsha jyldam bolýǵa tyrystym», - deıdi shubat ishýden synǵa túsken Gúlmıra Berdiqulova.
Uıymdastyrýshylar saıys úshin aýyldan arnaıy birneshe lıtr shubat aldyryp, qap-qap baýyrsaq ázirlegen. Júldegerlerge ortalyq ázirlegen arnaıy syılyqtar men dıplomdar tabystaldy. Aıta keteıik, jeńimpazdarǵa shubat, baýyrsaq, qarbyz da syıǵa berildi.