Aqtaýda sańyraý jandardyń jaıy máz emes
AQTAÝ. KAZINFORM – Aqtaýda sańyraý múgedekter qoǵamynyń músheleri ǵımarattyń joqtyǵynan, ár jerde kabınet jaldaýǵa májbúr. Bul týraly “Mańǵystaý sańyraý múgedekterdiń qoǵamy” qoǵamdyq birlestiginiń jetekshisi Vera Chývakbaeva Kazinform tilshisine bergen suhbatynda aıtty.
Búginde sańyraý múgedekter qoǵamynda eki júzge jýyq adam bar. Olardyń kóbi jastar. Eń kishisiniń jasy - 18 de. Vera Chývakbaevanyń aıtýynsha, múmkindigi shekteýli jandar eńbek qatynastary, quqyqtyq jáne turmystyq máseleler boıynsha múldem qorǵalmaǵan. Olardyń basty máselesi - turaqty jınalatyn orynnyń joqtyǵy.
- Bizdiń negizgi mindetimiz - jumysqa ornalasýǵa, qujat jınaýǵa zańdy turǵyda kómektesý, keńester berý, aýdarma jasap, til úıretý. Sańyraýlar qoǵamynda kóptegen másele bar. Turaqty oryn joq, ártúrli jerlerde kabınetter jaldaýǵa týra keledi. Ákimdikten bizge kez kelgen úı-jaıdy tegin bólýdi suradyq. Biraq qalalyq ákimdik máseleni sheshýden bas tartyp, bos oryn joq ekenin aıtty, - deıdi Vera Chývakbaeva.
Vera Chývakbaevanyń aıtýynsha, sańyraý jandar járdemaqynyń azdyǵyna, sańyraý otbasynyń deni saý balalaryna memleket tarapynan eshqandaı jeńildik joǵyna shaǵymdanady. Máselen múgedek balaǵa tólqujat tegin berilse, sańyraý ata-ananyń deni saý balasyna atalǵan qyzmet aqyly kórsetiledi.
- Múgedektigine baılanysty olar nebári 68 myń teńge alady. Oǵan kúneltý qıyn. Bul jandar jaqsy jalaqysy bar jumysqa da ornalasa almaıdy. Ol úshin bilim kerek. Jumys oryndarynda ózderiniń qaýipsizdigi úshin de qorqady. Jalpy, mektep bitirgen sańyraý jastardyń ary qaraı ýnıversıtette bilim alýyn qamtamasyz etý kerek, - deıdi qoǵamdyq birlestiktiń jetekshisi.
Vera Chývakbaevanyń ata-anasy da estý qabiletinen aırylǵan jandar. Sondyqtan ol bala kúninen ymdaý tilin úırengen. Boıjetken búginde sýrdo aýdarmashy bolyp jumys isteıdi. Sondaı-aq, 2019 jyldan beri “Mańǵystaý sańyraý múgedekterdiń qoǵamy” qoǵamdyq birlestiginiń jetekshisi qyzmetin atqarady.
Osy qoǵamdyq birlestiktiń arqasynda eki júzge jýyq adamnyń basym bóligi jumysqa ornalasqan.
Estý qabiletinen aırylǵan jandardy ǵımaratpen qamtý máselesine qatysty Aqtaý qalalyq ákimdigine biz de suraý salǵanbyz.
- Sizdiń suranysyńyz boıynsha qazirgi tańda qalalyq ákimdiktiń teńgeriminde bos ǵımarat joq, - dep jaýap berildi.
Buǵan deıin Aqtaýda oqýshylardyń mektepke kireberiste taptalyp qala jazdaǵanyn jazǵan bolatynbyz.
