Aqtaýda «Salamat Muqashev. Mańǵystaý kezeńi» atty kitaptyń tusaýkeseri ótti

AQTAÝ. QazAqparat - Bıyl memleket jáne qoǵam qaıratkeri, Qazaq KSR Joǵarǵy keńesi Prezıdıýmynyń tóraǵasy, Qazaq KSR Joǵarǵy Keńesi VII-XI  shaqyrylymynyń depýtaty bolǵan Salamat Muqashevtyń týǵanyna 90 jyl, dep habarlaıdy Mańǵystaý oblysy ákiminiń baspasóz qyzmeti.  

Qazaq dalasynyń dara tulǵasyn eske alyp, eńbegin qalyń buqaraǵa keńinen tanystyrý úshin Mańǵystaý tórinde saltanatty shara uıymdastyryldy. 

Astana qalasynyń 20 jyldyǵy jáne aqmarjan Aqtaý qalasynyń 55 jyldyǵyna tuspa-tus kelgen keshke Salamat Muqashulynyń ómirlik jary Márııam Sálimgereıqyzy men ul-qyzdary jáne kóptegen qoǵam qaıratkerleri qatysty.

 Ǵalymnyń kózi tirisinde qyzmettes bolǵan áriptesteri men úzeńgiles dostary Muqashulynyń eńbek jolyn Maqat munaı óndirý kásipornynda qarapaıym jumysshy bolýdan bastap, Qazaq KSR Joǵarǵy keńesi Prezıdıýmynyń tóraǵasyna deıingi qyzmet atqarǵanyn atap ótti. Tókken teri men etken eńbeginiń arqasynda uzaq jyldar boıy basqa­rýshy laýa­zymda júrip, kóptegen jas ma­mandarǵa ómirlik joldama bergen bilikti ustaz ekeni belgili. Qoǵam qaıratkeriniń 90 jyldyǵyna oraı  «Salamat Muqashev. Mańǵystaý kezeńi» atty kitaptyń tusaýy kesildi.

 Jıynda sóz alǵan Mańǵystaý oblysynyń ákimi Eraly Toǵjanov: «Elbasymyz N.Á.Nazarbaev aıtqandaı: «El úshin eńbek etý - asyl is. Árbir azamattyń árqashan Táýelsiz Qazaq Eliniń qalyptasýyna ári gúldenýine óz úlesin qosýy basty boryshy». Salamat Muqashuly dál osyndaı jaýapkershilikti abyroımen atqara bilgen azamat. Salamat aǵamyz eńbek jolyn Maqat munaı óndirý kásipornynda qarapaıym jumysshy bolýdan bastap, Qazaq KSR Joǵarǵy keńesi Prezıdıýmynyń tóraǵasyna deıingi qyzmet atqarǵanyn jaqsy bilemiz. Jetekshi kadrlardy irikteý, ornalastyrý jáne tárbıeleý máselelerin únemi na­zarynda ustap, olardyń kópshiliginen jo­ǵary dárejeli basshylar shyqqanyna kýá boldy. Qazaq dalasynyń birtýar azamaty - Salamat Muqashuly shyǵarmashylyq jumystarmen de aınalysty. Olaı bolýy da zańdylyq, óıtkeni rýhy bıik tulǵanyń kórgeni kóp, tájirıbesi mol, aıtary bar azamat edi. Ónegeli ómirdiń tanym-taǵylymdaryn qaǵaz betine túsirip, urpaqqa mıras retinde 7 kitap qaldyrdy», - dedi oblys ákimi Eraly Toǵjanov.