Aqtaýda onkologııalyq aýrýlardy erte anyqtaıtyn ortalyq ashyldy

ASTANA. KAZINFORM – Mańǵystaý oblysynda medıtsınalyq mamandar tapshylyǵy baıqalady. Máseleni sheshý úshin 164 grant bólinip, 195 dárigerge 1,2 mlrd teńge somasynda birjolǵy áleýmettik kómek kórsetilgen. Bul týraly óńir ákimi Nurdáýlet Qılybaı aıtty. 

Munaıly aýdanynda 150 tósek oryndyq aýrýhana salynyp, iske qosyldy. Jańa aýrýhana 173 myńnan astam jergilikti turǵyndy sapaly medıtsınalyq qyzmetpen qamtamasyz etýde.

– Oblysta 3 alǵashqy medıtsınalyq sanıtarlyq kómek kórsetý nysandary iske qosyldy. Onyń biri – pozıtrondy emıssııalyq tomografııa (PET) ortalyǵy. Ortalyq onkologııalyq aýrýlardy erte anyqtaýǵa jáne tıimdi emdeýge septigin tıgizedi. Osy zertteýden ótý úshin buryn oblystan jyl saıyn myńǵa jýyq turǵyn Astana men Almatyǵa ketse, qazir ony Aqtaý qalasynda ótkize alady, - dedi N. Qılybaı elordada Ortalyq kommýnıkatsııalar qyzmetinde.

Sonymen birge, Aqtaý qalasynda jedel járdem stantsııasynyń qurylysy aıaqtaldy jáne kelesi jyldyń basynda ashylady. Stantsııaǵa 32 jańa jedel járdem avtokóligi men aýdandyq aýrýhanalarǵa 18 dana jańa arnaıy sanıtarlyq avtokólikter tabystaldy.

Jańaózen qalasynyń medıtsınalyq mekemelerine de demeýshilik esebinen 2 zamanaýı jedel járdem avtokóligi tabystaldy, qosymsha 20 sanıtarlyq avtokólik kútilýde.

– Saladaǵy negizgi máseleniń biri – kadr tapshylyǵyn sheshý úshin bıyl medıtsına salasyna 164 grant bólindi, 195 dárigerge 1,2 mlrd teńge somasynda birjolǵy áleýmettik kómek kórsetildi, 21 qyzmettik páter satyp alyndy jáne shetelge oqýǵa 20 maman jiberildi, - dedi Mańǵystaý ákimi.

Buǵan deıin Nurdáýlet Qılybaı óńirdegi jumyssyzdyq máselesi qalaı sheshilip jatqanyn aıtqan edi.