Aqtaýda kúnniń qatty ysýy teńiz sýyn tushytýǵa áser etip otyr — MAEK
AQTAÝ. KAZINFORM — Qazirgi tańda óndiristik qýaty 52 000 tekshe metr bolatyn «MAEK» JShS táýligine shamamen 46 000 tekshe metr aýyz sý óndiredi. Aýyz sý óndirisiniń tómendeýine kúnniń kúrt ysýy men tushytatyn teńiz sýy temperatýrasynyń kúrt joǵarylaýy sebep bolyp otyr.
— Aýa temperatýrasy 40-42 gradýs Tselsıı deńgeıinde tur. Teńiz sýynyń temperatýrasy da kóterildi. Munyń bári sýdy tushytýdyń tehnologııalyq protsesine áser etip, óndiris kólemin azaıtady. Sondyqtan ákimdik keste boıynsha jelilerdegi sý qysymyn tómendetý týraly sheshim qabyldady. Sý kólemi ulǵaıǵannan keıin kestemen sý berý toqtatylady. Bul ýaqytsha qabyldanǵan májbúrli shara, — deıdi «MAEK» JShS bas dırektorynyń birinshi orynbasary Sábıt Jelkýshınov.
Ystyq aýa raıy aýyz sýdy tutynýdyń artýyna da áser etti.
Ortalyq sýmen jabdyqtaý jelilerinde aýyz sý deńgeıin turaqtandyrý maqsatynda qalanyń barlyq kólik jýý ortalyqtarynyń jumysyna ýaqytsha shekteý engizildi.
Aıta keteıik, Aqtaýda 72 kólik jýý ortalyǵy tirkelgen.
Jaqynda ótken aýyz sý máselesin retteýge qatysty jıynda Mańǵystaý oblysynyń ákimi Nurdáýlet Qılybaı aýyz sý tapshylyǵyn joıýǵa baǵyttalǵan jobalardy aıaqtaýdy jedeldetýdi tapsyrdy.
Tamyz aıyna qaraı eki jobany aıaqtaý josparlanǵan.
Máselen, «Kaspıı» sý tushytý zaýytynyń qýatyn táýligine 20 000 tekshe metrden 40 000 tekshe metrge deıin ulǵaıtý» jobasy bitýge jaqyn.
Qurylys montaj jumystary 95% aıaqtaldy. Búgingi kúni tehnıkalyq jabdyqtar kedendik rásimderden ótip, zaýytqa jetkizildi.
Tamyz aıynda óńir turǵyndaryna aýyz sý berý bastalady.
Sondaı-aq, «MAEK» JShS OSJT-2 (ekinshi ortalyq sýmen jabdyqtaý toraby) aýmaǵynda táýligine 6 000 tekshe metr sý tushytatyn qondyrǵylar paıdalanýǵa berildi.
Aldaǵy kúnderi qala turǵyndaryna táýligine qosymsha 6 myń tekshe metr aýyz sý beriledi.
