Aqtaýda kópqabatty úı otqa orandy
AQTAÝ. KAZINFORM - Aqtaýda kópqabatty úıden órt shyǵyp, turǵyndar qaýipsiz jerge shyǵaryldy.
Oblys ortalyǵyndaǵy 18a shaǵyn aýdanyndaǵy «Premium Plaza» turǵynúı kesheni janyp, órt sóndirý qyzmeti tilsiz jaýdy sóndirip aldy. Oqıǵa týraly TJD mamandary málimetti rastap, zardap shekkender tirkelmegenin atady.
«Búgin saǵat 15:06 kezinde Aqtaýdaǵy «Premium Plaza» turǵynúı kesheninde órt shyqqany týraly habarlama kelip tústi. Atalǵan úıdiń syrtqy qabyrǵasynyń 4 jáne 6 qabatyndaǵy bóligi janyp, órt 50 sharshy metr aýmaqty sharpydy. Jalyndap janǵan órt páterlerdiń ishine ótken joq. Oqıǵa kezinde turǵyndar ózderi syrtqa shyǵyp, qaýipsiz aýmaqqa ketti. Oqıǵanyń bolýy sebebin arnaıy mamandar anyqtap jatyr. TJD órt kezinde 5 tehnıka men 19 adamdy jumyldyrdy», - dedi Mańǵystaý oblystyq tótenshe jaǵdaılar departamentiniń baspasóz hatshysy Gúlnár Qojabekova.
Jarty saǵat boıy janǵan órt 15:30 kezinde tolyq sóndirilgen. Qazir turǵyndar óz páterlerine kirýge ruqsat aldy.
Buǵan deıin Aqtaýda kólik dóńgelegin jóndeý tsehynda gaz ballony atylyp, ózbekstandyq eki azamatty kúıik shalǵan edi. Dárigerler jansaqtaý bólimine jetkizilgen sheteldikterdiń jaıyn aýyr dep baǵalaǵan edi.
