Aqtaýda qysqa daıyndyq bastaldy
AQTAÝ. KAZINFORM — Aqtaý qalasy ákimdiginiń habarlaýynsha, qysta joldaǵy qaýipsizdikti qamtamasyz etetin topyraq pen tuz ázirlenip, tehnıkalar tizimi jasaldy.
Al Aqtaý qalasyndaǵy joldy kútip ustaýǵa «Kompanııa Stroı Invest 2020» JShS jaýapty.
— 2025 jyly qys mezgilinde avtomobıl joldaryndaǵy qaýipsizdikti qamtamasyz etý jáne avtomobıl joldaryn kútip ustaý maqsatynda, atalǵan kompanııa qysqy merzimdegi jumystardy tıimdi atqarý úshin 800 sharshy metr — topyraq, 200 tonna — tuz daıyndap, 6 júk tıegish avtokóligi, 4 avtotıegish, 2 avtogreıder men 4 tuz shashatyn arnaıy kólik, 2 vakýýmdyq mashına assenızator, 9 gazel jáne 12 dana motopompanyń tizimin jasaqtady. Sondaı-aq, qysqy merzimdegi kezekshilik kestesi men kezekshiliktegi jaýapty tulǵalardyń atqaratyn mindetteri bekitildi, — delingen habarlamada.
Sondaı-aq, qys mezgilinde kóshedegi jumystarǵa «Kompanııa Stroı Invest 2020» JShS-niń jol-jóndeý bólimi, avtokolonna ýchaskesi, sharýashylyq ýchaskesi jáne qaladaǵy qóshe sypyrýshylar jumyldyrylmaq.
Al, Mańǵystaý oblysy boıynsha joldarda qaýipsizdikti saqtaý úshin, jol paıdalaný ýchaskeleri qyzmet kórsetedi. Beıneýde — 57, Shetpede — 58, Aqtaý qalasynda — 59 jol paıdalaný ýchaskesi bar. Qys mezgilinde aýa raıynyń ózgerýine baılanysty joldyń taıǵaqtyǵyn eskertetin qosymsha 96 jol belgileri ornatylǵan.
Sonymen qatar, Jetibaı aýyly, Jańaózen qalasy jáne Manata asýynda qosymsha qum bazalary quryldy.
— «QAJservıs» fılıalynda 120-ǵa jýyq jumysshy bar. Avtojoldardy qysta kútip ustaý úshin 41 tehnıka jumys isteıtin bolady. Sonyń ishinde, osy jyly 7 quramdastyrylǵan arnaıy jol kóligi, 3 tıegish, 2 avtogreıder, barlyǵy 12 birlik tehnıka satyp alyndy. Qazirgi ýaqytta kóktaıǵaqqa qarsy materıaldardy daıyndaý jumystary júrgizilýde. Atap aıtqanda 1680 sharshy metr qum men 1000 tonna tuz daıyndaldy. 1500 sharshy metr qum qory taǵy satyp alynýda, — delingen Oblystyq jolaýshylar kóligi jáne avtomobıl joldary basqarmasy bergen málimette.
Aıta keteıik, oblys aýmaǵyndaǵy avtomobıl joldarynyń jalpy uzyndyǵy — 3063,2 shaqyrymdy quraıdy. Onyń 1013 shaqyrymy respýblıkalyq, 1029,3 shaqyrymy oblystyq, 1020,9 shaqyrymy aýdandyq mańyzdaǵy joldar.
Buǵan deıin, Aqtaýda 11 jasar qyzdyń basyna fýtbol qaqpasy qulap, aýyr jaraqat alǵany habarlandy.