Aqtaýda Kaspıı sý tuşytý zaýytynyń qýaty 2 ese artty

AQTAÝ. KAZINFORM — Osy kezge deıin táýligine 20 myń tekshe metr aýyz sý óndirip kelgen kásiporyn búginde 40 myń tekshe metr sý tuşytyp berip otyr.

Zaýyttyń qýatyn arttyrýdy Memleket basshysy tapsyrǵan bolatyn. Soǵan sáıkes, kásiporynda 2021 jyly qaıta jańǵyrtý jumystary bastalyp, byltyr jeltoqsanda aıaqtaldy.

Zaýyt dırektory Serik Gýsmannyń aıtýynsha, modernızatsııa jumystaryna memleketten bólingen 17 mlrd teńge jumsalǵan.

— Modernızatsııalaý aıasynda irgetasynan bastap qurylys angarlary salyndy. Úlken qondyrǵylar ákelindi. Jańadan 30 dan astam jumys orny ashyldy. Sonyń arqasynda búginde 160 adam turaqty túrde jumys istep jatyr. Qazir zaýyt Munaıly men Qaraqııa aýdandarynan bólek, Aqtaý qalasyna da qosymsha 17 myń tekshe metr aýyzsý berip otyr, — deıdi Kaspıı sý tuşytý zaýytynyń dırektory Serik Gýsman.

Zaýyttyń óndiris kólemin aldaǵy ýaqytta táýligine 100 myń tekshe metrge deıin jetkizý kózdelgen. Ol úshin modernızatsııa jumystarynyń kelesi kezeńinde táýligine 60 myń tekshe metr sý tuşytatyn taǵy bir nysan salý josparlanyp otyr. Sonyń bıyl jobalyq-smetalyq qujattaryn ázirleý jumystary bastalmaq.

Buǵan deıin Aqtaýda aýyzsý tapshylyǵy bolyp, Kaspıı sý tuşytý zaýytyn keńeıtý jumystary aıaqtalmaı jatqany týraly jazǵan bolatynbyz.