Aqtaýda Kaspıı ıtbalyǵyn ońaltý ortalyǵy ashyldy

AQTAÝ. QazAqparat – Aqtaýda Qazaqstandaǵy alǵashqy Kaspıı ıtbalyǵyn zertteý jáne ońaltý ortalyǵy ashyldy, dep habarlaıdy QazAqparat QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar álemi komıtetine silteme jasap.

Ortalyq syrqattanǵan jáne jaraqat alǵan ıtbalyqtardy emdeýmen, ońaltýmen jáne qaıtadan Kaspıı teńizine jiberýmen aınalysady. Ortalyq týraly «Sábı» qory jáne Ortalyqazııalyq ekologııalyq zertteýler ınstıtýty bastama kóterip, demeýshilik kórsetken.

Ortalyqty ashýǵa QR Ekologııa, geologııa jáne tabıǵı resýrstar vıtse-mınıstrligi Erlan Nysanbaev, Mańǵystaý oblysy ákiminiń orynbasary Rýslan Sákeev jáne ekologııalyq uıytsmdardyń ókilderi men volonterler qatysty.

Kaspıı ıtbalyǵy – Kaspıı teńizi faýnasyndaǵy jalǵyz teńiz sútqorektileri ókili. Túrli derekkózderge sáıkes, olardyń sany 100 myńnan aspaıdy jáne jyldan-jylǵa azaıyp keledi. Bul túrdiń bıologııalyq ereksheligi – olardyń maýsymdyq toptanýy. Qysta tóldeıdi, kóktemde – túleıdi jáne kúzde tóldeý oryndaryna kóshedi.

«Itbalyqtardyń shamamen 90% soltústik Kaspıı muzyna barady. Eń iri kóktemgi jáne kúzgi toptanýlar teńizdiń Qazaqstanǵa tıesili bóliginde – shyǵys Kaspıı jaǵalaýynda ótedi», - dep habarlady Komıtet.

Kaspıı ıtbalyǵy (Pusa caspica) Halyqaralyq tabıǵatty qorǵaý odaǵynyń Qyzyl tiziminde «Joǵalý qaýpi bar» (Endangered) ahýalynda tur. Kaspıı ıtbalyǵy joǵalyp ketý qaýpi bar túr retinde Ázerbaıjan (1993) men Túrikmenstannyń (2011) Qyzyl kitaptaryna engen.

Bıylǵy shilde aıynda qazaqstandyq jáne reseılik ǵalymdar 5 jylǵa josparlanǵan Soltústik Kaspıı aıdynyndaǵy Kaspıı ıtbalyǵyn zertteý baǵdarlamasyn bekitti.