Aqtaýda daryndy balalarǵa arnalǵan mektep-ınternat kolledji ashyldy
AQTAÝ. KAZINFORM — Prezıdent tapsyrmasyna saı Mańǵystaý oblysynda tuńǵysh ret sporttaǵy daryndy balalarǵa arnalǵan mektep-ınternat kolledji ashyldy. Bul týraly oblys ákimdiginiń baspasóz qyzmeti habarlady.
Bul — óńirde alǵash ret ashylyp otyrǵan, sport pen bilimdi ushtastyratyn arnaıy oqý orny. Mekeme olımpıadalyq sport túrleri boıynsha daryndy balalardy kásibı deńgeıde daıarlaýǵa baǵyttalǵan.
Internat 300 oqýshyǵa arnalǵan. Onyń ishinde 250 bala jataqhanamen qamtamasyz etilse, qatynap oqıtyn 50 oqýshy úshin arnaıy tasymal qyzmeti uıymdastyrylǵan.
Oqý ornynda boks, dzıýdo, taekvondo, erkin jáne grek-rım kúresi boıynsha jattyǵýlar ótkiziledi. Oqýshylar kún saıyn eki mezgil jattyǵyp, tájirıbeli jattyqtyrýshylardyń jetekshiligimen daıyndyqtan ótedi.
Internat-kolledjdiń ınfraqurylymy zamanaýı talaptarǵa sáıkes jabdyqtalǵan. Munda sport jáne kúres zaldary, oqý kabınetteri, kitaphana, medıtsınalyq ortalyq, jataqhana men ashana qarastyrylǵan. Oqý men jattyqtyrý jumystary memlekettik bilim standarttary men sporttyq talaptarǵa saı júzege asyrylady.
Aıta keteıik, BQO aýyldarynda 50-den astam emhana, 20-dan astam mektep ashyldy.