Aqtaýda dalalyq jerde jatqan snarıad tabyldy
AQTAÝ. KAZINFORM — Aqtaýlyq turǵyn «Oımasha» oqý polıgony mańyna sańyraýqulaq terýge shyǵyp, oq-dári taýyp alǵan. Ol bul týraly birden áskerı qyzmetkerlerge habar bergen. Oqıǵa 9 sáýir kúni bolǵan.
Osy oqıǵa boıynsha Aqtaý garnızony resmı jaýap berdi. Baspasóz qyzmetiniń habarlaýynsha Aqtaý qalasyndaǵy áskerı polıgonǵa irgeles aýmaqta jergilikti turǵyndar jarylmaı qalǵan snarıad bolýy múmkin kúdikti zatty anyqtaǵan.
— Oqıǵa ornyna Qarýly Kúshterdiń ınjenerlik-saperlik toby jedel túrde jiberildi. Mamandar aýmaqty tekserip, tabylǵan zatty oqshaýlaý jáne qaýipsiz joıý boıynsha birqatar qajetti sharany júzege asyrdy. Jaǵdaı baqylaýda. Halyq úshin qaýip joq, — delingen habarlamada.
Sonymen qatar, Aqtaý garnızonynyń baspasóz qyzmeti azamattardyń qaýipsizdik sharalaryn qatań saqtaý qajettigine erekshe nazar aýdardy. Kúdikti zattardy anyqtaǵan jaǵdaıda olarǵa qol tıgizýge, ornyn aýystyrýǵa nemese qandaı da bir óz betinshe áreket jasaýǵa qatań tyıym salynatynyn jetkizdi. Mundaı jaǵdaıda tabylǵan zat týraly dereý quqyq qorǵaý organdaryna nemese tótenshe qyzmetterge habarlaý qajettigin eske saldy.
Buǵan deıin, Aqtaýda Áskerı-teńiz kúshteri kemeleriniń jaýyngerlik ázirligi tekserilgen bolatyn.