Aqtaýda aýyz sý tapshylyǵy tolyǵymen joıyldy
ASTANA. KAZINFORM – Mańǵystaý oblysynda aýyz sý tapshylyǵy uzaq jyldar boıy kóterilip, narazylyq týdyryp kelgen kúrdeli másele boldy. Oblys ákimi Nurdáýlet Qılybaı máseleniń qalaı sheshilgenin aıtyp berdi.
Onyń aıtýynsha, Aqtaý qalasyndaǵy «Kaspıı» sý tuşytý zaýytynyń 2-kezeńi iske qosylyp, qýaty 40 myń tekshe metrge deıin artty.
– MAEK aýmaǵynda sý tuşytý qondyrǵysy iske qosylyp, Aqtaý qalasynyń aýyz sý kólemi táýligine 58 myńnan 84 myń tekshe metrge deıin artty. Nátıjesinde jyldar boıy Aqtaý qalasynda oryn alyp júrgen aýyz sý tapshylyǵy tolyǵymen joıyldy, - dedi N. Qılybaı elordada Ortalyq kommýnıkatsııalar qyzmetinde.
Sonymen birge, Kendirli kýrorttyq aımaǵyndaǵy «Toqmaq» jerinde táýligine 50 myń tekshe metr teńiz sýyn tuşyta alatyn zaýyt qurylysy aıaqtaldy. Zaýyt 2026 jyldyń basynan bastap Jańaózen qalasy jáne jaqyn mańdaǵy aýyldardy úzdiksiz aýyz sýmen qamtamasyz etedi.
– Osylaısha Jańaózendi de sýmen qamtý máselesi 100% sheshildi. Jańaózen qalasyn aýyz sýmen qamtyp otyrǵan Astrahan-Mańǵyshlaq sý qubyryna júkteme azaıady jáne atalǵan sý qubyrynan bosap shyqqan 26 myń tekshe metr sý Beıneý aýdany Beıneý aýylyna, Qaraqııa aýdany Jetibaı aýylyna, Munaıly aýdany Batyr, Qyzyltóbe, Mańǵystaý aýdanynyń aýyldaryna bólinip, jaz mezgilindegi qosymsha qajettilikti tolyqtaı jabady, - deıdi oblys ákimi.
Quryq aýylynda táýligine 10 myń tekshe metr sý tuşytatyn qondyrǵy ornatý jobasy aıaqtaldy. Nátıjesinde, Quryq aýyly, jyly jaǵajaı baǵyty tolyqtaı aýyz sýmen qamtylyp, sý kóleminiń qalǵan bóligi Aqtaý qalasyna Munaıly aýdany Batyr aýylyna beriledi.
Fort-Shevchenko qalasynda táýligine 5000 myń tekshe metr teńiz sýyn tuşytqysh qondyrǵy kesheni iske qosyldy. Nátıjesinde Fort-Shevchenko qalasy jáne jaqyn mańdaǵy eldi mekender úzdiksiz jáne tolyq kólemde aýyz sýmen qamtyldy.
Budan bólek, Aqshuqyr jáne Saıyn-Shapaǵatov aýyldarynda sý máselesi túbegeıli sheshildi.
Buǵan deıin Nurdáýlet Qılybaı Qazaqstan men Ázerbaıjan arasynda alǵashqy paromdar qatynaı bastaıtynyn aıtqan edi.
Sonymen birge, Mańǵystaý oblysynda 16 jańa jol salynyp jatyr.