Aqtaýda aýadaǵy kómirtegi oksıdi shamadan asyp ketken

Aqtaýlyqtar búgin tańerteń aýadaǵy kúıik ıisine shaǵymdandy. Ekologııa departamentiniń zerthanalyq-taldamaly baqylaý bóliminiń mamandary dereý Aqtaý qalasyndaǵy atmosferalyq aýadan synama alyp, nátıjesin aıtty, dep habarlaıdy Kazinform.

Synama nátıjesi boıynsha aýada kómirtegi oksıdiniń kontsentratsııasy shamadan asyp ketkeni anyqtalǵan.

Al tótenshe jaǵdaılar departamenti Mańǵystaý oblysynyń aýmaǵynda eshqandaı órt oqıǵasynyń oryn almaǵanyn aıtyp otyr.

- BAQ-qa monıtorıng júrgizý kezinde Reseı Federatsııasy Astrahan oblysynyń aýmaǵy, Kaspıı teńizi bóliginde birneshe táýlik boıy qamys órtengeni anyqtaldy. Bul faktini onlaın kartalardaǵy órtterdiń aeroǵaryshtyq monıtorınginiń nátıjeleri rastaıdy. Mańǵystaý oblysynyń «Qazgıdromet» RMK málimeti boıynsha 14 qarasha kúni saǵat 22:00-den búginge deıin jeldiń baǵyty soltústik-batystan soǵady, ortasha jyldamdyǵy - 5 m/s, ekpini 11 m/s jetedi. Bul – kúıiktiń ıisi Astrahan oblysyndaǵy órttiń saldary ekenine dálel bola alady, - delingen Mańǵystaý oblystyq ekologııa departamentiniń habarlamasynda.