Aqtaýda alǵash ret «Qyz Jibek» operasy qoıyldy

AQTAÝ. QazAqparat - Abaı atyndaǵy mádenı - demalys kesheniniń sahnasynda alǵash ret Ult aspaptar orkestriniń súıemeldeýimen «Qyz Jibek» operasy Mańǵystaý jurtshylyǵyna usynyldy, dep habarlaıdy QazAqparat ákimdiktiń baspasóz qyzmetine silteme jasap.

Ulttyq mýzykalyq ónerdiń injýi atanǵan qoıylym 1,5 saǵat jandy daýysta oryndaldy. Rýhanı jańǵyrý baǵdarlamasy aıasynda, eski dúnıeni jańǵyrtý baǵytynda, qazaq folklorynyń klassıkasy sanalatyn operany alǵash ret Mańǵystaýda sahnalaý ıdeıasyn Abaı atyndaǵy mádenıet saraıynyń kórkemdik jetekshisi Margarıta Omarova usynǵan bolatyn.

«Jastar jyly» jáne Abaı atyndaǵy MDK 45- jyldyǵyna arnap erekshe tosyn syı ázirleý maqsatynda osynaý úlken joba naýryz aıynan bastap qolǵa alynǵan. Al, ony júzege asyryp, joǵary deńgeıde oryndap shyǵý úshin N.Jantórın atyndaǵy oblystyq drama- teatrynyń ártisteri, Mańǵystaý óner kolledjiniń stýdenter hory, keshenniń shyǵarmashylyq ujymdary at salysyp, birlesip úlken jumys atqardy.

Qoıylymdy mýzykamen árlegen Ult aspaptar orkestri, jetekshisi ári dırıjeri Jaqsylyq Nurqojaev.

«Operany tamashalaýǵa kelgen kórermen zalǵa toly boldy. Mádenı keshten rýhanı azyq alǵan kópshilik erekshe áser alǵandaryn jasyrmaı, rızashylyqtaryn bildirdi», delingen habarlamada.