Aqtaýda 4 adam sýǵa batyp ketti

AQTAÝ. KAZINFORM – Qaıǵyly oqıǵalar 26, 27 shilde kúnderi demalys oryndarynyń aýmaǵynda bolǵan. Mańǵystaý oblystyq tótenshe jaǵdaılar departamentiniń málimetinshe, birinshi oqıǵa 26-shildede 21-25 te Aqtaý qalasynan 48 shaqyrym jerdegi «O'Mir Glamping» demalys bazasynda tirkelgen.

— Oqıǵa ornyna kelgende eki er adamnyń mert bolǵanyn kórdik. Olar sýǵa batyp bara jatqan qyzdardy qutqarǵan. Qyzdardyń jaǵdaıy qalypty. Alaıda, eki er adam ózderi teńizge batyp ketken. 1986 jylǵy er adamnyń denesi jaǵalaýdan 10 metr jerde sýdan shyǵaryldy. Ekinshi marqumnyń denesi túngi saǵat 00-05 shamasynda jaǵadan 10-15 metr jerden teńiz túbinen tabylyp, shyǵaryldy, — delingen habarlamada.

Kelesi kúni 27-shilde kúni atalǵan demalys bazasyna jaqyn jerde taǵy da qaıǵyly jaǵdaı bolyp, 22 jastaǵy jigit sýǵa ketken.

— Jedel qutqarý jumystaryna kirisip, izdeý jumystary júrgizildi. Marqumnyń denesi tańerteń tabylyp, sýdan shyǵaryldy, — delingen tótenshe jaǵdaılar departamentiniń habarlamasynda.

Oblystyq tótenshe jaǵdaılar departamentiniń habarlaýynsha, Quryq aýyly aýmaǵyndaǵy teńizden de er adamnyń máıiti tabylǵan.

— 2025 jylǵy 27 shilde kúni saǵat 20:00–de Qaraqııa aýdany, Quryq aýylynan 4 shaqyrym jerdegi Kaspıı teńiziniń «jabaıy jaǵajaı» aýmaǵynda 1987 jyly týǵan turǵynnyń máıiti sýdan tabylyp, jaǵaǵa shyǵaryldy. Aldyn ala málimet boıynsha, marqum týystarymen birge demalyp júrip, sýǵa túsýge arnalmaǵan orynda shomylǵan. Shamamen saǵat 19:25–te sýǵa batyp ketken. Er adamnyń alkogoldik mas kúıde bolǵany anyqtaldy, — delingen habarlamada.

Buǵan deıin, Mańǵystaýda nóser jańbyr jaýyp, qarǵyn sý joldy shaıyp ketken bolatyn.