Aqtaýda 3 aılyq sábıdiń mıyna kúrdeli ota jasaldy
Anasynyń aıtýynsha, tańǵy 6:00 shamasynda kishkentaı sábı mazasyzdanǵan jáne denesi kógere bastaǵan. Sol boıy anasy «103» qyzmetine habarlasyp, sábı jedel járdem brıgadasynyń kómegimen shuǵyl aýrýhanaǵa jetkizgen.
Oblystyq densaýlyq saqtaý basqarmasy baspasóz qyzmetiniń habarlaýynsha, sábıge qoıylǵan dıagnoz aýyr naýqastar sanatyna jatady.
«Atap aıtqanda, mıdaǵy qan aınalymynyń buzylysy, mıdyń isinýi, tamyr ishindegi taralǵan qan uıý sındromy, postegorragııalyq anemııa dıagnozdary qoıyldy. Jalpy jaǵdaıy óte aýyr bolǵandyqtan aq halatty abzal jandar shuǵyl túrde ota jasaý týraly sheshim qabyldaǵan» delingen habarlamada.
Anestezıologııa, reanımatsııa jáne qarqyndy terapııa bólimshesiniń meńgerýshisi Mereke Bekbaevtyń aıtýynsha, sábıdiń sanasy mı komasynda, bet pishini jáne kóz sańylaýy sımmetrııaly bolǵan. Sonymen qatar menıngealdyq sımptomdary kúmándi jáne mıkrotsırkýlıatsııalyq buzylystar baıqalǵan. Teri jamylǵysy óte bozǵylt, sarǵysh bolǵan. Al otany balalar neırohırýrgi Erbol Kenjevalov jasaǵan.
«Náreste kúndizgi 12:30 shamasynda jedel járdem brıgadasymen balalar aýrýhanasyna jetkizildi. Balanyń jalpy jaǵdaıynyń aýyrlyǵyna baılanysty mıynyń kompıýterlik tomografııasy jasalyp, jansaqtaý bólimshesine aýystyryldy. Tolyq tekserilgen soń 6 saǵat ótkende operatsııa jasaldy. Trepanatsııa jasalyp, gematoma alyndy. Ota 1,5 saǵatqa jalǵasty. Qazirgi tańda sábı jasandy tynys alý apparatyna qosylǵan. Osylaısha konservatıvti emin jalǵastyrýda», - deıdi ol.
Sábı ázirge dárigerlerdiń baqylaýynda bolady, aýrýhanada qansha kún jatyp em alatynyn dóp basyp aıtý qıyn. Oǵan bolashaqta da medıtsınalyq kómek qajet bolýy múmkin. Jaǵdaıy jaqsarǵan soń úıine jiberiledi. Aq halatty abzal jandar sábıge muqııat kútim jasalsa, jaǵdaıy jaqsaryp, bul dıagnozdy tolyqqandy jeńýge bolatynyn aıtady.
