Aqtaýda 250-ge jýyq úlesker baspanaǵa qol jetkize almaı júr
AQTAÝ. KAZINFORM — Turǵyndar «Aısar» qurylys kompanııasyna tıesili «Aq bosaǵa» turǵyn úıinen baspana alý úshin qarajattaryn tolyq tólep qoıǵan.
Aıtýlarynsha turǵyn úı 2023-shi jyly tapsyrylýy tıis edi. Alaıda, áli qurylysy aıaqtalmaǵan. Turǵyndar páter jaldap, qınalyp júrgenderin aıtady.
— Bizge ýaqyt ber dedi, berdik. Odan beri de 2023, 2024 ótip ketti. 2025-ke keldik. Bul qashan bitetin úı? Ár jerde úı jaldap, qańǵyryp júrmiz. Men ózim jalǵyz úıimdi satyp, aqshasyn osyǵan saldym, — deıdi úleskerlerdiń biri Balkenshe Súıindik.
Eki jylǵa jýyq ár jerde páter jaldap sendelgen jurt qurylys basyna jınaldy. Alaıda, jaýapty kompanııa basshylyǵy tóbe kórsetpedi.
— Biz ótirikten sharshadyq. Páter jaldap, qaraıǵan bala-shaǵamyzben júre beremizbe sonda? Qashan bitedi? Bul ótiriktiń arty qashan aıaqtalady? Meniń talabym — úıimizdi tezirek bitirip bersin. Naýryz aıynda kiltin bersin, — deıdi úlesker Jumabıbi Quttyǵulova.
Mańǵystaý oblystyq sáýlet, qurylys baqylaý basqarmasynyń málimetinshe, atalǵan turǵyn úıdiń qurylysqa qatysty qujattary rásimdelgen biraq, shıkilik bar. Sol úshin kásipkerge birneshe ret eskertý jasalǵan.
— Erteń bitirgen jaǵdaıda da qurylysty tapsyrý qıyn bolady. Turǵyndardyń máselesi boıynsha kásipkermen jeke turǵynnyń arasynda kelisimshart bar. Biz kásipkerge myna ýaqytta tapsyr dep mindetteı almaımyz. Sondyqtan turǵyndar azamattyq turǵyda sot organdaryna shaǵymdaný arqyly qarjysyn óndire alady nemese qurylystyń aıaqtalǵanyn kútedi, — deıdi Mańǵystaý oblystyq memlekettik sáýlet, qurylys baqylaý basqarmasy qala qurylysyn baqylaý bóliminiń basshysy Qýandyq Amanqosuly.
Basqarmanyń dereginshe, búginde Mańǵystaýda 30 zańsyz qurylys bar. Onyń barlyǵy da turǵyn úı qurylystary. Olarǵa 3500-ge jýyq turǵyn qarjy tólep qoıǵan.
Buǵan deıin, Aqtaýda bir top ata-ananyń alaıaqqa aldanyp qalǵany týraly jazǵan bolatynbyz.