Aqtaýda 14 jasar bala teńizge batyp ketti

AQTAÝ. KAZINFORM – Qaıǵyly oqıǵa keshe keshkisin 9 A shaǵyn aýdan aýmaǵyndaǵy Kaspıı teńiziniń jaǵalaýda bolǵan. 

2011 jyly týǵan 2 jasóspirim sýǵa batyp kete jazdaǵan. Olardy demalýshylar baıqap, sýdan shyǵarǵan. Alaıda, jetkinshekterdiń biri oqıǵa ornynda qaza tapty. Ekinshi bala aýrýhanaǵa jetkizilgen.

- Ókinishke qaraı, 14 jastaǵy bala sýǵa ketip qaldy. Balalar sýǵa túsýge bolmaıtyn, ıaǵnı jabdyqtalmaǵan jerde shomylǵan. Ózderińiz biletindeı, Kaspıı teńiziniń tartylýyna baılanysty, jaǵalaýda tastaq jerler kóbeıdi.

Qazirgi tańda oblys aýmaǵynda sýǵa túsýge bolmaıtyn ári jabdyqtalmaǵan 10 oryn bergilendi. Sol jerlerde bizdiń qyzmetkerler jumys isteıdi. Sonda da turǵyndar ózderi saq bolý kerek. Balalarǵa jaz maýsymynda ruqsat etilmegen jerlerge sýǵa túspeýge keńes beremin, - deıdi Mańǵystaý oblystyq tótenshe jaǵdaılar departamentiniń resmı ókili Erlan Sultanmuratov. 

Dárigerlerdiń aıtýynsha, ekinshi jasóspirim oblystyq balalar aýrýhanasynyń jansaqtaý bóliminde em alyp jatyr. Jaǵdaıy turaqty. 

Buǵan deıin, Mańǵystaýlyq maman aımaqta sý tapshylyǵyn boldyrmaýdyń joldaryn aıtqan bolatyn.