Aqtaýda 12 shaǵyn aýdan jaryqsyz otyr

AQTAÝ. KAZINFORM — Aqtaý qalalyq ákimdigi baspasóz qyzmetiniń habarlaýynsha, Mańǵystaý óńirlik elektrtoraptyq kompanııasynda búgin saǵat 13:40–ta 3G qosalqy stantsııasynda apattyq jaǵdaı bolyp, elektr qýaty ajyraǵan.

Sonyń saldarynan 12, 13, 14, 15, 16, 19, 26, 27, 28, 28A, 29 jáne 30-shaǵyn aýdandar ýaqytsha jaryqsyz qaldy. Jabdyqtyń zaqymdanýy aýa raıynyń ystyǵyna baılanysty artyq júktemeniń saldarynan bolǵan.

— «MÓEK» AQ apattyq brıgadasy qalpyna keltirý jumystaryn istep jatyr. Mamandar elektr energııasyn múmkindiginshe tez arada qaıta qosý úshin bar kúshin salyp jatyr. Jóndeý jumystarynyń aldyn-ala aıaqtalý ýaqyty shamamen 21:00, — delingen habarlamada.

Buǵan deıin, Mańǵystaý oblysy Qaraqııa aýdanynyń Quryq aýylyndaǵy jalpy bilim beretin mektep-gımnazııanyń akt zalynyń tóbesi qulap qalǵany týraly jazǵan edik.