Aqtaýda 10 myń adamǵa arnalǵan zamanaýı stadıon salynady

AQTAÝ. KAZINFORM – Bul týraly Mańǵystaý oblysy ákiminiń baspasóz qyzmeti habarlady. Óńir basshysy Nurdáýlet Qılybaıdyń tóraǵalyǵymen ótken jıynda Aqtaý qalasynda salynatyn jańa stadıonnyń tujyrymdamasy talqylanǵan. 

– Jobany «Qazaq energetıka jáne baılanys ǵylymı-zertteý jobalaý ınstıtýty» JShS ókilderi tanystyrdy. Jospar boıynsha Aqtaýda 10 000 kórermenge arnalǵan kópfýnktsıonaldy stadıon boı kóteredi. Jańa sport nysany zamanaýı talaptarǵa saı salynyp, fýtbol akademııasymen jabdyqtalady. Munda sportshylarǵa qajetti barlyq jaǵdaı jasalyp, oqý-jattyǵý alańdary, kıim aýystyratyn bólmeler, medıtsınalyq pýnkt pen jattyǵý zaldary qarastyrylady, - delingen habarlamada.

Jobalaý jumystary kelesi jyly tolyq aıaqtalyp, qurylys kezeńine ótý josparlanǵan. Oblys ákimi Nurdáýlet Qılybaı jobalaý-izdestirý jumystaryn baqylaýda ustaýdy jáne belgilengen merzimde aıaqtaýdy tapsyrdy.

Buǵan deıin, Mańǵystaýda 90 myń gektardan astam jer memleket menshigine qaıtarylǵany týraly jazǵan bolatynbyz.