Aqtaý teńiz saýda portyna halyqaralyq mártebe berildi

Premer-Mınıstr Álıhan Smaıylov «Aqtaý teńiz saýda portyna halyqaralyq mańyzy bar teńiz porty mártebesin berý týraly» Úkimet qaýlysyna qol qoıdy, dep habarlaıdy QazAqparat.

«Aqtaý teńiz saýda portyna halyqaralyq mańyzy bar teńiz porty mártebesi berilsin. Qazaqstan Respýblıkasy Kólik, Ulttyq ekonomıka, Qarjy mınıstrlikteri Qazaqstan Respýblıkasynyń zańnamasynda belgilengen tártippen osy qaýlydan týyndaıtyn qajetti sharalardy qabyldasyn», - delingen Premer-Mınıstr qol qoıǵan qaýlyda.

Qujat qol qoıǵan kúnnen, ıaǵnı 21 qyrkúıekten bastap kúshine endi.

Buǵan deıin habarlǵanymyzdaı, atalǵan bastama elimizdiń kólik-tranzıt áleýetin damytý maqsatynda qolǵa alyndy.

«Joba Memleket basshysynyń jańa geosaıası jaǵdaılarda Qazaqstan Respýblıkasynyń kólik-tranzıt áleýetin damytý máselesi týraly 2022 jylǵy 5 shildedegi keńestiń qorytyndysy boıynsha bergen tapsyrmasyna sáıkes ázirlengen. Osy jobany iske asyrý respýblıkalyq bıýdjetten qarajat bólýdi talap etpeıdi», - dep túsindirme berilgen qaýlyǵa.

Eske salaıyq, 2018 jyldyń qyrkúıegine deıin Aqtaý teńiz saýda porty halyqaralyq mártebege ıe boldy. Keıin Úkimet qaýlysymen ol alynyp tastaldy.