Aqtaý porty EQYU-nyń «jasyl» sertıfıkatyn aldy
Aqtaý teńiz saýda porty «Porttardyń ekologııalyq saraptama júıeleri» sertıfıkatyn jáne Teńiz porttarynyń eýropalyq uıymynyń «Ekoport» mártebesin ıelengen Qazaqstandaǵy alǵashqy port boldy.
Sertıfıkattaý EQYU-nyń porttar men port termınaldaryndaǵy ekologııalyq menedjmenttiń halyqaralyq tanylǵan standarty – «EcoPorts» jobasy sheńberinde júrgizilgen.
2019 jyly bastalǵan EQYU-nyń bul jobasy teńiz jáne transkontınentaldyq júk tasymaldarynyń ınfraqurylymyn damytýǵa, tsıfrlandyrýdy engizý arqyly kedendik rásimderdi ońaılatýǵa, otandyq mamandardy daıarlaý men oqytýǵa baǵyttalǵan.
Málim etilgendeı, atalǵan sertıfıkat eýropalyq porttarmen ózara qarym-qatynasty keńeıtýge múmkindik beredi jáne porttardyń qorshaǵan ortaǵa teris áserin azaıtýǵa, sondaı-aq Kaspıı óńirindegi ekologııalyq jaǵdaıdy jaqsartýǵa yntalandyrady.
«Endigi kezekte jasyl sertıfıkattaýdan ótý boıynsha tıisti jumystar Quryq portynda da júrgizilýde.
Saýda joldary men jetkizý tizbekteriniń halyqaralyq saıası-ekonomıkalyq jaǵdaıǵa beıimdelýi aıasynda bıyl qazaqstandyq porttardyń qyzmetterine suranys kúrt ósti», - delingen SІM habarlamasynda.
Máselen, Aqtaý portynda 2022 jyldyń bes aıynda júkterdi aýystyryp tıeý kólemi 2021 jyldyń tutas kórsetkishin qazirdiń ózinde 97 paıyzǵa oryndaǵan (2022 jylǵy 5 aıda 1 534 myń tonna, al 2022 jyl bastalǵaly 1 594 myń tonna), al konteınerlerdi aýystyryp tıeý kórsetkishi qazirdiń ózinde byltyrmen salystyrǵanda 115% (16 267 JFE) ósti.
Quryq portynda 2022 jyldyń basynan bastap júkterdi aýystyryp tıeý kólemi 2021 jyldyń tutas kóleminiń 70% asqan (2022 jyldyń bes aıynda 700 myńnan astam, al 2021 jyly 1 mln tonna).
Termınal qyzmetterine suranystyń ósýin eskere otyryp, qazirgi ýaqytta Aqtaý porty Ortalyq Azııa óńirindegi kólik aǵyndaryn transformatsııalaýǵa arnalǵan konteınerlik hab quryp jatyr. Sondaı-aq Aqtaý-Baký-Aqtaý baǵytyndaǵy qazirgi 5 fıderlik kemege jyl sońyna deıin eki qosymsha mamandandyrylǵan konteıner tasyǵyshty tartý josparlanýda.
Sonymen qatar Brıýsselde ótken is-shara aıasynda qazaqstandyq porttar qyzmetkerleriniń Belgııanyń Antverpen porty janyndaǵy ınfraqurylymdy basqarý boıynsha oqý kýrstaryna jiberý múmkindigi talqylandy.
Bir kún buryn, THKB, TRASEKA jáne Qazaqstan porttary basshylarynyń delegatsııasy Antverpen portyna tehnıkalyq saparmen barǵan. Bul belgııalyq hab álemdegi eń iri 20 porttyń qataryna kiredi jáne Nıderlandtaǵy Rotterdam portynan keıin Eýroodaqtaǵy ekinshi iri port bolyp sanalady.
