Aqtaý mańynda jylý elektr ortalyǵy órtenip jatyr
Oblystyq tótenshe jaǵdaılar departamentiniń málimetine qaraǵanda 31 mamyr kúni keshki saǵat 21.42 shamasynda qutqarý qyzmetine shuǵyl habar túsken.
Onda Aqtaý qalasynan 7 shaqyrym qashyqtyqta «MAEK QazAtomÓnerkásip» jaýapkershiligi shekteýli seriktestigi aýmaǵynda úshinshi jylý elektr ortalyǵyndaǵy beti ashyq taratý qurylǵysynan órt shyqqany habarlanǵan.
Qazirgi tańda qutqarýshylar órtti sóndirip jatyr. Qyzyl jalyn 600 sharshy metr aýmaqqa jaıylǵan.
Zardap shekken eshkim joq.
«Bul oqys jaǵdaı óńirdi elektr energııasymen qamtamasyz etýge esh áser etpeıdi. Kásiporyn shtattyq rejımde jumys istep tur» dep málim etti departamenttiń baspasóz qyzmeti.
Tilsiz jaýdy aýyzdyqtaýǵa TJD 15 qyzmetkeri men 6 tehnıkasy, kásiporynnyń ózinen - 4 adam, polıtsııadan taǵy 4 qyzmetker jumyldyrylǵan.