Aqtaý mańyndaǵy ushaq apatynyń sebebi jyl sońyna deıin anyqtalady
ASTANA. KAZINFORM — Halyqaralyq IKAO uıymy Aqtaý mańyndaǵy ushaq apatynyń sebebine qatysty aldyn ala esepti joǵary baǵalady.
Bul týraly Kólik mınıstriniń orynbasary Talǵat Lastaev málim etti.
— IKAO talaptaryna, standarttaryna jáne usynylǵan tájirıbege sáıkes tergeýge bir jyl beriledi. Tıisinshe, tergeý qorytyndysy bıyl jeltoqsanǵa deıin daıyn bolýy tıis. Qylmystyq tergeýge kelsek, bul prokýratýra organdarynyń quzyretine jatady, osy oraıda qylmystyq ispen aınalysatyn jedel-tergeý toby quryldy. Qylmystyq tergeý merzimi boıynsha ózderi túsinikteme beredi, — dedi Talǵat Lastaev Úkimet úıinde ótken baspasóz máslıhatynda.
Onyń aıtýynsha, avıatsııa salasyndaǵy barlyq standart pen normany IKAO uıymy retteıdi.
— Bir apta buryn, Abý-Dabıde jahandyq is-shara barysynda IKAO bas hatshysy jáne prezıdentimen kezdesý ótti. Olar Qazaqstannyń ushaq apatyna qatysty aldyn ala eseptiń deńgeıi men sapasyn joǵary baǵalap, faktilerdiń naqty baıandalýyn, aqparattyń naqtylanýy men tolyqtyǵyn atap ótti, — deıdi ol.
Eske salsaq, 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyrady. Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qalǵan edi.
Taıaýda Aqtaý mańyndaǵy ushaq apaty boıynsha tergeýdiń esebi jarııalandy.
Búgin Aqtaýdaǵy ushaq apatynan keıin Kólik oqıǵalaryn tergeý jónindegi arnaıy ortalyq qurylatyny belgili boldy.