Aqtaý garnızonynda «Jeńis saıabaǵy» ashyldy

AQTAÝ. QazAqparat - Saıabaq Mańǵystaý oblysynyń qorǵanys isteri jónindegi departamentiniń aýmaǵynda ornalasqan, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Patrıottyq saıabaqtyń ashylý saltanatyna Qorǵanys mınıstrliginiń basshylyǵy men «Qarýly Kúshterdiń ardagerleri» respýblıkalyq qoǵamdyq birlestiginiń ókilderi, Mańǵystaý oblysynyń ákimi Nurlan Noǵaev qatysty.

– El Táýelsizdiginiń 30 jyldyǵyna oraı batyrlarymyzǵa qurmet kórsete otyryp, «Jeńis saıabaǵyn» ashýdyń erekshe máni bar. Qarýly Kúshter ardagerleriniń bastamasymen salynǵan bul saıabaq Otan qorǵaýshylar urpaqtarynyń sabaqtastyǵyn, boryshqa, áskerı ar-ujdan zańdaryna, jaýyngerlik baýyrlastyqqa jáne halyqqa qyzmet etýdegi adaldyǵyn eske salady, – dedi Qorǵanys mınıstriniń orynbasary general-maıor Muhamedjan Talasov.

Saıabaqty qurý týraly bastamany otstavkadaǵy polkovnık Nurlybaı Qonaqbaev bastaǵan «Qarýly Kúshterdiń ardagerleri» respýblıkalyq qoǵamdyq birlestigi fılıalynyń ókilderi kóterdi.

Shaǵyn saıabaqtyń aýmaǵynda sýburqaq, Uly Otan soǵysyna qatysqan qazaqstandyq jaýyngerdiń músini, Aýǵanstanda áskerı boryshyn óteý kezinde qaza tapqan mańǵystaýlyqtardyń esimderi jazylǵan granıt tuǵyrlyqtar, Qazaqstannyń kórnekti qaıratkerleri men Uly Otan soǵysy batyrlarynyń portretteri salynǵan stendter ornalasqan. Ǵımarat ishinde Jaýyngerlik dańq bólmesi de bar.