Aqtaý áýejaıyna kirýshilerdiń quqyǵy buzylyp jatqan joq - sot sheshimi

AQTAÝ. QazAqparat – Aqtaý áýejaıynyń termınalyna kireberistegi mindetti tekserý sharasy azamattardyń quqyǵyn buzady. Mańǵystaý oblystyq básekelestikti qorǵaý jáne damytý departamentiniń bul habarlamasy zańsyz dep tanyldy. Bul týraly oblystyq sottyń baspasóz qyzmetinen málim etti, dep habarlaıdy QazAqparat tilshisi.

22 mamyrda QR Básekelestikti qorǵaý jáne damytý agenttiginiń Mańǵystaý oblysy boıynsha departamenti «Aqtaý halyqaralyq áýejaıy» AQ-ǵa habarlama joldaǵan. Onda áýejaı ǵımaratyna kirerde barlyq adamdy mindetti túrde tekserip kirgizý olardyń quqyqtaryn buzatynyn, ıaǵnı básekelestikti qorǵaý zańnamalary saqtalmaıtynyn kórsetken.

«Áýejaı qaýipsizdik saqtaý termınalǵa kirý sátinen bastalatynyn jáne áýejaı qaýipsizdigin qadaǵalaý monopolııany retteý organdarynyń quzyryna jatpaıtynyn kórsetip, atalǵan habarlamany zańsyz dep tanyp, kúshin joıýdy surap, ákimshilik sotqa júgindi. Mańǵystaý oblysy mamandandyrylǵan aýdanaralyq ákimshilik sotynyń 22 shildedegi sheshimimen talap qanaǵattandyryldy», - dedi oblystyq sottyń baspasóz qyzmetinen.

Sot otyrysy barysynda termınalǵa kirgen kezde kelýshilerdi tekserý Aqtaý halyqaralyq áýejaıynyń avıatsııalyq qaýipsizdik baǵdarlamasymen belgilengeni anyqtalǵan. Ol monopolııaǵa qarsy organnyń habarlamasynda silteme jasaǵan ushý aldyndaǵy tekserýden ózgeshe ekeni belgili boldy.

Sondaı-aq, monopolııany retteý organynyń habarlamasy mynadaı negizdermen zańsyz dep tanylǵan:

- Halyqaralyq uıymdar azamattyq avıatsııanyń tikushaq bortynda, áýejaı aýmaǵyndaǵy qaýipsizdigine asa nazar aýdarady;

- Áýejaı aýmaǵynyń qaýipsizdigin qamtamasyz etý, termınalǵa kirý sátinen bastalýy qajet. Sebebi, adamdar áýejaıǵa kirip ketkennen keıin qaýipsizdikti baqylaý múmkin bolmaıdy;

- Jolaýshylar men qarsy alýshylardy, olardyń qoljúkterin tekserý, áýejaıdyń qaýipsizdigin baqylaý, áýejaı termınalyna qaýipti zattardyń ótip ketýiniń aldyn alý maqsatynda atqarylyp, zańnamalyq aktilerge saı belgilengen tártipterge sáıkes júrgiziledi.

Sot sheshimi zańdy kúshine engen joq.