Aqshany qalaı únemdeý kerek – qarjygerden keńes

ASTANA. KAZINFORM – Jibek Joly telearnasynyń «Búgin LIVE» baǵdarlamasynda qarjyger Gımran Ábdirahmanov keńesin bólisip, aqshany únemdeýdiń joldaryn túsindirdi.

Qarjyger tabystyń 10%-yn únemdeý kerek degen dástúrli qaǵıda eskirgen dep sanaıdy.

– Buryn 10 paıyz dep aıtylatyn. Qazir bul az. 20-30%-dan astam saqtaý kerek. Aqshany únemdeýdiń birneshe joly bar: sheshilmeıtin depozıt ashý, merzimdik jınaqtar, jınaqtaýshy saqtandyrý baǵdarlamalary. Sondaı-aq aktsııa, 3 jyldyq oblıgatsııa sııaqty quraldardardy da qarastyrý kerek.  Ekinshi deńgeıli bankterden 1 gramm altyn satyp alýǵa bolady, qazir ol shamamen 70 myń teńge turady. Eki jyl buryn 50 myń bolatyn. Bul da bir ınvestıtsııa, – deıdi sarapshy.

Sarapshy Parkınsonnyń ekinshi zańyna toqtaldy.

– Tabys artqan saıyn shyǵyn da kóbeıedi. Sondyqtan ony basqarýdy úırený, qarjylyq saýatty meńgerý mańyzdy, – deıdi ol.

Ekonomıst shyǵyndardy shekteýdiń ár adamnyń jeke ómirine baılanysty ekenin atap ótti.

– Mysaly, shoý-bızneste júrgen adam ózine qalaǵanynsha qarjy quıa alady, sebebi jumsalǵan qarajat aqtalady. Al aqtalmaıtyn jaǵdaıda shyǵyndy shekteý kerek. Árbir shyǵyn ınvestıtsııa retinde qarastyrylýy tıis, – dedi maman.

Sonymen qatar qarjyger emotsıonaldy shopıngten aýlaq bolýǵa shaqyrdy.

– Jeńildikterdiń sońynan júgirmeý qajet. 50 myń teńgeniń zaty 30 myńǵa satylýy múmkin emes. Adam óz-ózin aldap, ony satyp alady. Bul – emotsıonaldy shopıng, – dep eskertti Ábdirahmanov.

Sarapshynyń aıtýynsha, qarjylyq saýatty bala kezden bastaǵan durys.

– Bala óz eńbeginiń arqasynda aqsha keletinin bilip, durys qarjylyq ádetterdi damyta alady, – dedi Gımran Ábdirahmanov.

Aıta keteıik, Qazaqstanda 90 kúnnen asqan nesıesin óteı almaı júrgen azamattardyń sany 1 mln 600 myńnan asyp otyr.