AQSh Iemenge taǵy da soqqy berdi
Amerıkalyq kúshter búgin, 13 qańtarda jergilikti ýaqyt boıynsha tańǵy saǵat 3:45-te Iemendegi hýsıtterdiń radıolokatsııalyq stantsııasyna shabýyl jasady. Kazinform bul týraly AQSh Ortalyq qolbasshylyǵyna (CENTCOM) silteme jasap habarlaıdy.
Bul soqqyny USS Carney avıatasymaldaýshy kemesi Tomahawk zymyrandary arqyly jasady. Áskerıler operatsııanyń Prosperity Guardian alıansymen jasalǵan kelisimderge qaramastan júrgizilgenin aıtty.
Hýsıtterdiń «Al Masirah» telearnasy AQSh pen Ulybrıtanııanyń áskerı ushaqtarynyń Iemen astanasy Sanaǵa jańadan áýe shabýyly jasaǵanyn habarlady. Alaıda London resmı túrde Ulybrıtanııa qarýly kúshteriniń jańa soqqyǵa qatysqanyn áli rastaǵan joq.
CENTCOM málimetinshe, radarlarǵa jasalǵan soqqylar hýsıtterdiń Qyzyl teńizdegi kemelerge shabýyl jasaý qabiletin buzý úshin qajet. Buqaralyq aqparat quraldary Hodeıda portyndaǵy Ál-Daılamı avıabazasynyń mańynda jarylystardyń estilgenin, jaǵalaýdaǵy radarlar men baqylaý núktelerine shabýyldar bolǵanyn habarlady.
Esterińizge sala keteıik, keshe, 12 qańtarda AQSh pen Ulybrıtanııa Iemendegi 60 nysanǵa, onyń ishinde radarlar, áýe shabýylyna qarsy qorǵanys júıeleri, qoımalar, drondar men zymyran ushyrý alańdaryna shabýyl jasady. Hýsıtterdiń habarlaýynsha, Amerıka Qurama Shtattary men Ulybrıtanııanyń shabýyly nátıjesinde 5 sarbazynyń qaza tapqany týraly habarlady.
Ulybrıtanııalyq jáne amerıkalyq sheneýnikterdiń aıtýynsha, bul shabýyl 2023 jyldyń jeltoqsanynan beri Qyzyl teńizdegi halyqaralyq kemelerge jıi jasalǵan shabýyldarǵa jaýap retinde uıymdastyryldy.
AQSh prezıdenti Djo Baıden Iemendegi soqqynyń Qyzyl teńizdegi «buryn-sońdy bolmaǵan hýsıt shabýyldaryna» jaýap jáne qorǵanys sıpatynda ekenin aıtty. Ulybrıtanııa premer-mınıstri Rıshı Sýnak ta hýsılerdiń pozıtsııalaryna jasalǵan soqqylardyń ózin-ózi qorǵaýdyń shekteýli jáne proportsıonaldy áreketi ekenin atap ótti.
Hýsıler AQSh pen Ulybrıtanııanyń Iemenge jasaǵan shabýylyn Batystyń Gazadaǵy jaǵdaıdan nazardy keri aýdartý áreketi dep málimdedi. Olar soqqyǵa qaramastan Qyzyl teńizdegi Izraılge qarasty azamattyq kemelerge shabýyldaryn jalǵastyratyndaryn aıtty.
