AQSh-tyń tanymal antropology Pol Teılor Tamǵaly jartasyn zerttemek
Birlesken jumys saparynyń basty nátıjesi Tamǵaly landshaftyn Jahandyq ekologııalyq qorǵa engizý (GEF) bolmaq, dep habarlaıdy QR MSM baspasóz qyzmeti.
Pol M. Teılor Qazaqstanǵa Tamǵaly landshaftynyń bıologııalyq kóptúrliligin zertteýge ádeıilep keldi. Tanymal antropolog GEF jobasynyń basty halyqaralyq áriptesi retinde qatysýǵa qyzyǵýshylyǵyn bildirýde. Sapar barysynda Azııa mádenıetin zertteýmen aınalysatyn kórnekti ǵalym Smıtson ınstıtýty tarıhı-mádenı muralardy zerdeleý men saqtaý salasyndaǵy birlesken qazaq-amerkandyq jobalarǵa erekshe múdde bildiretindigin jetkizdi.
Buǵan deıin Pol Teılor Ázerbaıjandaǵy Gobýstan arheologııalyq landshaftyn zertteýmen aınalysqan bolatyn. Teılor jetekshilik etetin Antropologııa departamenti baǵdarlamasynyń arqasynda zertteýshiler 3D-model jasaý, tsıfrlyq óńdeý, beınelerdi arhıvteý jáne t.b. túrli tehnıkalarmen jumys isteýge múmkindik aldy.
«Qazirgi ýaqytta Qazaq ǵylymı-zertteý mádenıet ınstıtýty Jahandyq ekologııalyq qorǵa (GEF) baıqaýǵa ótinish jobasy boıynsha jumystar júrgizýde. «Bıologııalyq kóptúrlilik» nomınatsııasy boıynsha biz Almaty oblysyndaǵy Tamǵaly jartasynyń biregeı landshaftyn qosýdamyz, - dedi Qazaq ǵylymı-zertteý mádenıet ınstıtýtynyń bas dırektory A. Hazbýlatov. - Bul jumysty ınstıtýt Qazaqstan Respýblıkasy mádenı saıasatynyń Tujyrymdamasy jáne Týrızm salasyn 2020 jylǵa deıin damytý Tujyrymdamasyn júzege asyrý aıasynda júrgizip jatyr».
Andreı Hazbýlatov ústimizdegi jyldyń maýsym aıynda Vashıngtonda (AQSh) GEF ókilderi Pıter Lallas jáne Patrısııa Kokkamen kezdesý ótkendigi týraly aıtty. Bul kezdesý kezinde yqtımal joba máseleleri talqylandy. Tamǵalynyń biregeı petroglıfteri ıÝNESKO-nyń Búkilálemdik mura tizimine engizilgendigi barlyǵymyzǵa málim, degenmen, otandyq sarapshylardyń pikirinshe, Tamǵaly landshafty Qyzyl kitapqa engizilgen qaldyq ósimdikter men janýarlardy biriktiretin ǵajaıyp florasy men faýnasy tań qaldyrady.
Eske sala ketsek, Tamǵaly jartasy - bes myńnan asa túrli petroglıfteri bar jartas óneriniń eń kóne jáne asa iri eskertkishteriniń biri. Olardy zertteý ishki jáne syrtqy mádenı týrızmniń damýyna septigin tıgizedi.
