AQSh týrısterden elge kirý úshin áleýmettik jelidegi akkaýntyn kórsetýdi talap etýi múmkin

ASTANA. KAZINFORM — AQSh-tyń shekara qyzmeti týrıster týraly kóbirek derek jınaýdy josparlap otyr. Amerıkalyq BAQ-tyń kedendik-shekaralyq qyzmetke silteme jasap habarlaýynsha, onyń ishinde burynǵy telefon nómirleri, IP-adrester, bıometrııalyq derekter jáne sońǵy bes jyldaǵy áleýmettik jelidegi belsendilik bolýy múmkin, dep jazdy DW.

Derek jınaýdy keńeıtý týraly jospar vızasyz kirý baǵdarlamasyna qatysatyn 42 eldiń saıahatshylaryna baǵyttalǵan. Olardyń qatarynda Germanııa, Polsha, Ulybrıtanııa, Baltııa elderi, Izraıl jáne Ońtústik Koreıa bar. Áleýmettik jelidegi profılderdi kórsetý – ESTA júıesi arqyly ótinim berý kezinde mindetti talapqa aınalmaq. Mundaı aqparat kórsetilmegen ótinim tolyq emes dep tanylyp, qabyldanbaýy múmkin. Buǵan deıin mundaı derekter tek erikti túrde nemese shekarada arnaıy suratylǵan jaǵdaıda ǵana usynylatyn.

Uqsas talaptar buǵan deıin basqa vıza sanattaryna qoldanylǵan. 2019 jyldan bastap ımmıgratsııalyq jáne beıımmıgratsııalyq vızalarǵa ótinish berýshilerdiń barlyǵy áleýmettik jelidegi akkaýnttaryn ashyp kórsetýge mindetteldi. 2025 jyldyń maýsymynan bastap bul talap sheteldik stýdentterge de engizildi.

AQSh-tyń kedendik-shekara qyzmeti bul sharany bekitý úshin Bıýdjet basqarmasyna resmı suraý joldaıdy. Alaıda talaptyń ózi qyzmettiń resmı paraqshasynda jarııalanyp, qoǵam men múddeli organdardyń talqylaýyna shyǵarylǵan.

Aıta keteıik, Tramp ákimshiligi 85 000 vızanyń kúshin joıdy.