AQSh-tyń ishki qaýipsizdik hatshysyna ımpıchment jarııalanýy múmkin

ASTANA. KAZINFORM - Seısenbide AQSh-tyń Ókilder palatasynyń ishki qaýipsizdik komıteti Іshki qaýipsizdik mınıstri Alehandro Maıorkasqa ımpıchment jarııalaýdyń eki babyn maquldady. Sheneýnikke ımpıchment jarııalaý boıynsha daýys berý kelesi aptada AQSh-tyń Ókilder palatasynda ótedi, dep habarlaıdy Fox News.

Hatshyǵa «Kongress qabyldaǵan ımmıgratsııa jáne shekara qaýipsizdigine qatysty zańdardy birneshe ret buzdy» jáne shekara qaýipsiz jáne jabyq, sondaı-aq Іshki qaýipsizdik departamenti (DHS) shekarany jedel baqylaýyn júzege asyryp otyr dep «Kongreske jalǵan málimdeme jasady» aıyptary taǵyldy. 

«Úsh jyl ishinde bizde shekaradan zańsyz ótýdiń 10 mıllıon jaǵdaıy oryn alyp, 300 myńǵa jýyq amerıkandyq opıoıdterdiń artyq dozasynan qaıtys boldy. Biz sol jerde elimizdi joǵaltyp jatyrmyz. Al bul saıasatty júzege asyrýǵa jaýapty adam — Alehandro Maıorkas», — dedi respýblıkalyq Kleı Hıggıns.

Demokrattar respýblıkashyldardy tek saıası sebepterge baılanysty ımpıchment jarııalaýǵa tyrysty dep aıyptap otyr.

«Respýblıkashyldar ilgerileýdi qalamaıdy. Olar sheshimderdi qajet etpeıdi. Olar saıası máseleni qalaıdy. Eń bastysy, olar ózderiniń masqara bolǵan burynǵy prezıdentin qýantqysy keledi», — dedi Ókilder palatasynyń bedeldi múshesi, demokrat Bennı Tompson.

Іshki qaýipsizdik mınıstri óz kezeginde ózine taǵylǵan jalǵan aıyptardy joqqa shyǵardy. 

«Bizdiń buzylǵan jáne eskirgen ımmıgratsııalyq júıemizdiń problemalary jańalyq emes. Immıgratsııalyq zańdarymyz sońǵy ret 1996 jyly qaıta qaraldy. Bizdiń ımmıgratsııalyq zańdarymyz 21 ǵasyrdaǵy kóshi-qon úlgilerine arnalmaǵan», — dedi Maıorkas óz sózinde.

Ókilder palatasy mınıstrge ımpıchment jarııalaýǵa daýys berse, bul is AQSh Senatynyń qaraýyna jiberiledi.