AQSh-tyń memlekettik qaryzy alǵash ret 38 trln dollardan asty

ASTANA. KAZINFORM – AQSh-tyń memlekettik qaryzy osy aptada alǵash ret 38 trln dollardan asyp, rekord jańartty, dep habarlaıdy FOX Business.

23 qazandaǵy jaǵdaı boıynsha jalpy memlekettik qaryz 38 trln dollarǵa jetti. Tamyz aıynyń ortasynda AQSh-tyń memlekettik qaryzy alǵash ret 37 trln-ǵa jetken edi, al 2024 jyldyń jeltoqsanynda 36 trln dollar sheginen asty.

Sońǵy onjyldyqta AQSh-tyń memlekettik qaryzy halyqtyń qartaıýyna jáne áleýmettik qamsyzdandyrý men medıtsınalyq kómekke tirkelgen adamdar sanynyń artýyna baılanysty tez ósti. Qaryzdyń ósýin basqaratyn taǵy bir negizgi faktor – ınflıatsııany tejeý úshin belgilengen joǵary paıyzdyq mólsherlemelerge baılanysty ósken federaldy qaryzǵa qyzmet kórsetýge baılanysty paıyzdyq shyǵyndar, sondaı-aq qaryzdyń óziniń ósýi boldy.

«Peter G. Peterson Foundation» bas dırektory Maıkl Peterson memlekettik qaryzǵa qyzmet kórsetý quny ósip kele jatqanyn atap ótti. Sońǵy onjyldyqta ol AQSh úshin shamamen 4 trln dollardy qurady jáne aldaǵy 10 jylda shamamen 14 trln dollardy quraıdy. Ol paıyzdyq shyǵyndar «bizdiń bolashaǵymyz úshin mańyzdy memlekettik jáne jeke ınvestıtsııalardy alyp tastap, árbir amerıkalyqtyń ekonomıkasyna zııanyn tıgizedi» dep qosyp ótti.

30 qyrkúıekte aıaqtalǵan sońǵy qarjy jylynda federaldy úkimet shamamen 1,8 trln dollar bıýdjet tapshylyǵyna tap boldy jáne áleýmettik baǵdarlamalar men qaryz paıyzdaryn tóleýge jumsalatyn shyǵyndardyń boljamdy ulǵaıýy aldaǵy jyldarda budan da úlken tapshylyqqa ákeledi dep kútilip otyr.

Osy kezeńde jyldyq bıýdjet tapshylyǵy 2035 jyly shamamen 2,6 trln dollarǵa deıin ósedi dep shamalanyp otyr, al kelesi onjyldyqtaǵy jalpy tapshylyq ulttyq qaryzdy 22,7 trln dollarǵa arttyrady.

Buǵan deıin jahandyq qaryz rekordtyq deńgeıge jetkenin jazǵan bolatynbyz.