AQSh-taǵy Qazaqstan elshiligi asharshylyq taqyrybyna dóńgelek ústel uıymdastyrdy

NUR-SULTAN. QazAqparat - Vashıngtonda «1930 jyldardaǵy Qazaqstandaǵy Asharshylyqty eske alý» taqyrybynda onlaın dóńgelek ústel ótti, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Іs-sharany Qazaqstannyń AQSh-taǵy Elshiligi Djordj Vashıngton ýnıversıteti (GWU) janyndaǵy Ortalyq Azııa baǵdarlamasymen birlese uıymdastyrdy.

Dóńgelek ústel aıasynda Merılend ýnıversıtetiniń professory, Asharshylyq týraly kitaptyń avtory Sara Kemeron, GWU Halyqaralyq qatynastar fakýltetiniń dekany Pıter Rollberg, qazaqstandyq saıasattanýshy jáne «Táýekelderdi baǵalaý tobynyń» dırektory Dosym Satpaev, GWU janyndaǵy Eýropalyq, reseılik jáne eýrazııalyq zertteýler ınstıtýtynyń dırektory Marlen Larýel sóz sóıledi.

Іs-sharany asha otyryp, Qazaqstan Elshisi Erjan Ashyqbaev Asharshylyq tragedııasynyń ult tarıhynda alatyn erekshe orny týraly túsinikteme berip, bul taqyrypty qoldan saıasılandyrmaı, ony birinshi kezekte ǵylymı turǵyda keshendi zertteý qajettiligine negizdelgen ustanym basym bolýy tıis ekenine erekshe toqtaldy.

Asharshylyqtyń sebepteri men saldaryn sıpattaı otyryp, S. Kemeron bul oqıǵalardy zertteýde orys tilindegi qujattarmen qatar qazaq tilindegi derekkózderdi qoldanyp, oǵan barynsha obektıvti qaraýǵa múddeli ekenin eskertti. Sonymen birge atalǵan taqyrypqa ǵylymı qoǵamdastyqtyń qyzyǵýshylyǵy artyp kele jatqanyn jáne ony AQSh-ta osyndaı is-shara aıasynda alǵashqy ret talqylanyp otyrǵanyn atap ótti.

Óz kezeginde D. Satpaev óziniń mádenı-aǵartý qorynyń qatysýymen S. Kemeron kitabynyń qazaq tilinde jaryq kórýi Qazaqstannyń jas urpaǵynyń ult tarıhyndaǵy osy qaıǵyly kezeńdi tereń túsinýine úles qosatynyna senim bildirdi.