AQSh-taǵy joıqyn sý tasqyny: qaza tapqandar bar

ASTANA. KAZINFORM — AQSh-tyń Kentýkkı shtatynda adamdar sý deńgeıiniń tez kóterilýinen zardap shekti. Myńnan astam qutqarý operatsııasy júrgizildi, segiz adamnyń qaza tapqany rastaldy, dep habarlaıdy NBC News. 

Adamdar ólimine ákelgen oqıǵalar Hart, Paık jáne Kleıdi qosa alǵanda, birneshe okrýgte tirkeldi. Munda tasqyn sý jol boıyndaǵy turǵyndardy jáne kólikterdi basyp shaıyp áketti.

40 myńǵa jýyq turǵyn jaryqsyz, 9800 adam aýyz sýsyz qaldy, al 26 myńǵa jýyq adamǵa lastanǵan sýdy qaınatýǵa keńes berildi.

Jeksenbi kúni Kentýkkı shtaty gýbernatorynyń málimdeýinshe, prezıdent Donald Tramptyń onyń tabıǵı apat saldaryn joıý boıynsha qarjylandyrý týraly ótinishin maquldady.

— Bul kem degende on jyldaǵy eń aýyr aýa raıy qubylystarynyń biri, — dedi Kentýkkı shtatynyń gýbernatory Endı Beshır jeksenbide.

2150-deı turǵyny bar Kentýkkı shtatynyń Bıttıvıll qalasy evakýatsııalandy, dep habarlady Lı okrýginiń sýdıasy Stıv Meıs.

Kentýkkıde sý kólikter men ǵımarattardy basyp qaldy, al Vırdjınııada kóshkin joldardy jaýyp tastady. Eki shtatta da sý tasqyny qaýpi bar.

Buǵan deıin Brazılııadaǵy sý tasqynynan 96 adam qaza tapqanyn jazǵan bolatynbyz.