AQSh-ta sırek soǵatyn borannan kem degende 9 adam qaza tapty

ASTANA. KAZINFORM – Seısenbiden bastap AQSh-tyń ońtústiginde sırek soǵatyn qysqy «Entso» daýyly kúsheıip, eldiń kóp bóliginde aıazdy aýa raıyn ákeldi. Sársenbi kúni tańerteńgi jaǵdaı boıynsha daýyldan kem degende 9 adam qaza boldy. Bul týraly amerıkalyq BAQ habarlady, dep jazdy Sınhýa aqparat agenttigi. 

AQSh-tyń Ulttyq meteorologııalyq qyzmetiniń habarlaýynsha, Jańa Orlean (Lýızıana), Mobıl (Alabama), Pensakola (Florıda) jáne basqa da kóptegen qalada qardyń rekordtyq kólemi jaýdy. Jańa Orleandaǵy 1948 jyldan beri eń qatty boran tirkeldi. 

Qysqy daýylǵa baılanysty AQSh ońtústigindegi birneshe shtatta tótenshe jaǵdaı jarııalandy. Meksıka shyǵanaǵy jaǵalaýynda qar men kóktaıǵaq saldarynan birneshe iri áýejaıda birneshe reıs, 30-ǵa jýyq aımaqaralyq tasjolda kólik qozǵalysy toqtatyldy. Bastaýysh jáne orta mektepter, memlekettik mekemeler jáne kóptegen dúken men meıramhanalar jabyldy.

CNN telearnasynyń habarlaýynsha, qatty sýyq pen kóktaıǵaq joldar saldarynan bolǵan aýyr jol-kólik oqıǵalary men basqa da apattardan 9 adam qaza tapty. 

Qolda bar derekterge súıensek, qysqy boran seıile bastady. Sársenbi kúni tańerteńgi jaǵdaı boıynsha, AQSh-tyń aýa raıy qyzmeti taratqan aıazdy kún raıy týraly eskertý eldiń shyǵys jáne ońtústik-shyǵys bólikterindegi 25 mln-nan astam adamǵa áser etip otyr.